03 дек 2014 09:50Тоҷикистон / Сиёсат

Суръати марговар

Атохон Ғаниев, рӯзноманигор

Ҳамасола дар дунё тақрибан 1 миллион одам дар садамаи автомобилӣ ҷони хешро аз даст медиҳанд. Ҳар сол дар ҷаҳон зимни бозгашт аз мактаб 500 кӯдак дар зери чархҳои автомобил монда, ба ҳалокат мерасанд.

Ин нуктаро котиби генералии СММ Пан Ги Мун зимни баргузории рӯзи ёддошти қурбониёни садамаи автомобилӣ изҳор дошт. Ба гуфти роҳбари СММ, садамаҳои автомобилӣ боиси қурбонии садҳо ҷавонони аз 15 то 29 сола мегардад.

Инчунин, миллионҳо одамон пас аз садама маъюби якумрӣ мешаванд, изҳор намуд Пан Ги Мун.

Аммо на ҳар ронанда медонад, ки аз сабаби саҳлангорию бепарвоӣ ва ё худнамоию ҷоҳилии ӯ ва надонистану риоя накардани қоидаҳои ҳаракати роҳ аз ҷониби ӯ, гар сабабгори садамае шуд, пас ӯ ҳам дар ин дунё ва ҳам дар охират масъулияти калоне бар дӯш хоҳад дошт..
Мушоҳида мешавад, ки аксари ронандагон зимни ҳаракат дар роҳҳои Душанбе, бинобар надонистани қоидаҳои ҳаракати роҳ, мошинро, хеле бо суръати баланд идора мекунанд ва ҳар лаҳза хавфи садамавиро ба вуқӯъ меоранд.

Бисёре аз ронандагон худ иқроранд, ки шаҳодатномаи ронандагиро тавассути маблағ ба даст овардаанд. Пас оё метавон аз чунин ронандаи бесавод, риояи ҳатмии бехатарии роҳро талаб кард, дар ҳоле ки ӯ аз ин ҳатто огаҳии сарсарӣ надорад?

Дар садамаҳое ки аксари рӯзҳо рӯй медиҳанд, пиёдагардон ҳам сабаб мешаванд. Бо вуҷуди мавҷудияти роҳҳои зеризаминӣ, аз миёни роҳ гузаштан, вақти сурх будани чароғаки раҳнамо низ раҳро убур намудан ва ё барқасд, аз пеши роҳи нақлиёти ҳаракаткунанда баромадани пиёдагардон, гоҳо боиси фалокати ҳалокатбор мегардад.

Ҳар як фалокат, шояд сабаби марги нафаре, маъюбӣ, ятим мондани кӯдакон, хисороти зиёди моддию маънавӣ гардида, доғи андуҳу мусибат ба дилҳо боқӣ хоҳад гузошт.

Аммо, каме аз ронандагон зимни сари чамбараки мошин нишастан дар ин маврид фикр мекунанд. Агар ин тавр намебуд, новобаста аз ҳузури мусофирони зиёд дар мошин, байни ҳам “мусобиқаи ку, кӣ тезтар?” ташкил намекарданд...

Дар паси баъзе аз мошинҳо навиштаҷоти аҷибе ҳаст: “Оҳиста рон! Туро дар хона мунтазиранд.”

Аммо бархе аз ронандагон маънии ин гуфтаҳоро замоне мефаҳманд, ки дигар эҳтиёҷ ба оҳиста рондан нест...

Мӯҳр

Хабарҳои монанд: