Маслиҳати Тураҷонзода ба зане, ки масеҳиро дӯст доштааст
Ҳоҷӣ Акбар Тураҷонзода, руҳонии саршиноси тоҷик ва қозии пешини мусулмонони Тоҷикистон издивоҷи зани мусулмон бо марди ғайримусулмон, аз ҷумла масеҳиро ҳаром хондааст. Ин руҳонии тоҷик гуфтааст, “Издивоҷи зани мусалмон бо марди насронӣ (масеҳӣ) ба иҷмои уламо ҳаром аст.”
Ин ҳарфҳоро қозии пешини мусулмонони кишвар дар посух ба суоли Фотима, яке аз корбарони торнамои хонаводагии бародарон Тураҷонзодаҳо - Turajon.org баён доштааст. Фотима навиштааст, “як марди масеҳӣ (христиан) ва як зани мусалмон ба ҳамдигар хело муҳаббат пайдо карданд ва мехоҳанд издивоҷ кунанд. Ҳатто мард мехоҳад барои издивоҷ бо ин зан Исломро қабул кунад . Аз Шумо хоҳиш дорам шарҳ медодед чӣ бояд кард?”
Ба гуфтаи Ҳоҷӣ Акбар Тураҷонзода, издивоҷи зани мусулмон бо ин марди масеҳӣ замоне аз нигоҳи шариати исломӣ раво дониста мешавад, ки он мард дини мубини Исломро қабул кунад ва пайвандони зан низ ба ин издивоҷ розигӣ диҳанд: “То он мард мусалмон нашавад ҳаққи издивоҷ кардан бо зани мусалмонро надорад. Агар мусалмон шуд ва соҳибони духтар ба издивоҷи фарзанди худ бо ӯ розӣ шуданд, пас метавонанд бо ҳам никоҳ карда, зиндагӣ кунанд.”
Ин дар ҳолест, ки Саодат Амиршоева, вакили парлумони Тоҷикистон низ ахиран гуфта буд, ӯ зидди издивоҷи духтарони тоҷик бо мардони ғайримусулмон аст. Амиршоева таъкид кард, ки ҳамчун намояндаи мардумии тоҷик барои ҷилавгирӣ аз ин раванд талош хоҳад кард: “Дар ҳақиқат имрӯз мо мебинем, ки духтарони мо аз паси бойгарию пулу мол рафта, ба мардони миллати дигар издивоҷ менамоянд, ки барои ҳамаи мо модарони тоҷик бисёр аламовар аст. Мо мардуми тоҷик, ки мусалмон ҳастем ва дар дини мубини ислом қарор дорем, ягон хел ҳуқуқ надорем, ки бо мардони ғайри дин издивоҷ намоем. Ман ҳамчун вакил ба Шумо ваъда медиҳам, ки агар чанде Сарқонун (Конститутсия) озодии никоҳро кафолат медиҳад Худо хоҳад ман ҳаракат мекунам, ки барои пеши ин амалро гирифтан ягон чораи дахлдор ҷӯям.”
Ба иттилои Вазорати адлияи Тоҷикистон ҳолатҳои ақди никоҳи шаҳрвандони кишвар бо хориҷиҳо тайли солҳои ахир коҳиш ёфтааст. Рустам Менглиев, вазири адлияи кишвар дар нишасти хабарии ниҳоди таҳти раҳбариаш моҳи январи соли равон гуфта буд, тайи соли 2013 шаҳрвандони Тоҷикистон бо 137 атбои хориҷӣ ақди никоҳ бастаанд. Дар ҳоле ки ин нишондод, ба гуфтаи ӯ, дар соли 2012 наздик ба 300 ҳолат ва дар соли соли 2010 теъдоди чунин издивоҷҳо аз ҳадди 700 адад гузашта буд. Масъулини Вазорати адлия ин камшавиро ба шартҳои нави издивоҷи шаҳрвандони тоҷик бо атбои хориҷӣ рабт медиҳанд, ки аз соли 2011 мавриди амал қарор гирифтаанд.
Пас аз тасвиби тағйиру иловаҳо дар Кодекси оилаи Тоҷикистон дар соли 2011 танҳо он хориҷиёне метавонанд, бо шаҳрвандони Тоҷикистон ақди никоҳ банданд, ки як соли охир дар Тоҷикистон зиста, ҳамсари худро бо манзили зист таъмин карда метавонанд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |