23 дек 2014 18:01Тоҷикистон / Акс

Анҷоми ҷаласаи президентҳо таҳти раёсати Раҳмон дар Кремл (АКСУ ВИДЕО)

Ҷаласаи навбатии сарони давлатҳои-аъзои Созмони Аҳдномаи амнияти дастаҷамъӣ (СААД) дар Маскав таҳти раёсати Эмомалӣ Раҳмон, раисиҷумҳури Тоҷикистон ба поён расид.

Тибқи иттилои дафтари матбуоти раисиҷумҳури Тоҷикистон дар ин ҷаласа беш аз 20 масъала баррасӣ шуд: “Аз ҷумла масоили вобаста ба таҳкими ҳамгироӣ дар мубориза бо терроризму ифротгароӣ дар минтақа ва ҷаҳон, ҳамоҳангсозии фаъолияти сохторҳои кории созмон ва кишварҳои аъзо, аз ҷумла нерӯҳои муштараки низомию махсус ва нерӯҳои посдори сулҳ, такмили механизмҳои истифода аз нерӯҳои муштарак, кумак ба Тоҷикистон барои пурзӯр намудани ҳифзи сарҳади давлатӣ бо Афғонистон ва ҳамчунин омодагӣ ба истиқболи ҷашни 70-солагии ғалаба дар Ҷанги Бузурги Ватании солҳои 1941-1945 аз ҷумлаи мавзӯъҳои асосии рӯзномаи ҷаласа буд. Таваҷҷуҳи асосӣ ба пурзӯр намудани мубориза бо терроризму ифротгароӣ, ки солҳои охир хатари он ба минтақаи масъулияти СААД, пеш аз ҳама дар Осиёи Марказӣ хеле афзудааст, зоҳир карда шуд.”

Ба иттилои манбаъ сарони кишварҳои узви СААД тасмим гирифтанд, ки ҷаласаи ояндаашон моҳи октябри соли 2015 дар шаҳри Душанбе баргузор мегардад.

Манбаъ мегӯяд, Эмомалӣ Раҳмон ва дабири кулли созмони мазкур Николай Бордюжа зимни натиҷагирии ҳамоиш ба раёсати Федератсияи Русия дар созмон баҳои баланд дода, изҳори боварӣ намудаанд, ки дар ҷараёни як соли раёсати Тоҷикистон ҳам барои таҳким ва рушди минбаъдаи ҳамкории сиёсӣ, ҳарбӣ, ҳарбию техникӣ ва ҳарбию иқтисодии давлатҳои аъзои Созмони Аҳдномаи амнияти дастаҷамъӣ корҳои назаррасу муассир анҷом хоҳанд ёфт.

Дар ҳамин ҳол ба иттилои масъулини Кремл дар ҷаласа сарони кишварҳои Тоҷикистон, Русия, Белорусия, Қирғизистон, Қазоқистон ва Арманистон иҷрои қарор дар бораи ироаи кӯмаки техникӣ-низомӣ барои таҳкими ҳифзи сарҳадоти Тоҷикистонро муҳокима кардаанд. Инчунин қарор дар мавриди “Маркази ҳамоҳангсозию машваратии СААД оид ба масоили компютерӣ” қабул шудааст, ки барои мубориза бо ҷинояткорӣ дар соҳаи технологияи иттилоотӣ-коммуникатсионӣ равона шудааст.

Дар маҷмуъ ба иттилои Кремл дар пайи ҷаласаи Шӯро ҳудуди 20 санад, аз ҷумла изҳороти сарони кишварҳои узв, 19 қарор ва ду эъломия ба имзо расидаанд.