02 янв 2015 11:17Тоҷикистон / Тема дня

Ирсоли парвандаи Рафида Минигалеева ба додгоҳ

Мақомоти пулиси вилояти Саратови Русия тафтиши парвандаи ҷиноӣ алайҳи соҳибкорзани тоҷикистонӣ, Рафида Минигалееваро ба итмом расонда ба додгоҳ ирсол намудааст.

Дафтари матбуоти раёсати умури дохилии ин вилоят бо нашри як иттилоия таъкид намудааст, ки зимни тафтишот беш аз 100 шоҳид бозпурсӣ шуда, 41 шахси воқеию ҳуқуқӣ ҳамчун ҷабрдида баромад кардаанд. Минигалееваи 52-сола дар сӯзондани бозори “Сенной” ё худ барои нобуд кардани моли шахси дигар муттаҳам мешавад, ки қаблан мақомоти Русия ҳаҷми зарари онро беш аз ним миллиард рубл арзёбӣ намуд.

Сӯхтори бозори “Сенной” моҳи феврали соли гузашта рух дода, дар пайи он 1500 метри мураббаи бозор нобуд ва ҳудуди 200 соҳибкор зарар дид. Муттаҳам дар сӯхтор баъди 8 моҳи кофтукоб, 31 октбяр дар Маскав боздошт гардида, баъдан ба Саратов интиқол дода шудааст.

Андрей Чепурной, ноиби сардори пулиси вилояти Саратов қаблан гуфт, ин зан дар яке аз хаймаҳои бозори “Сенной” ба фурӯши либосҳои махсуси моҳигирӣ машғул будааст ва зимни бозпурсӣ изҳор доштааст, он замон мушкили молӣ дошт ва бозорро ба нияти худкушӣ сӯзондааст: “Сабти дастгоҳҳои назоратӣ нишон доданд, ки аз нуқтае, ки оташ сар зад, ин зан бо як зарфи панҷлитрӣ баромад. Маводи сӯхтро ин зан чанд рӯз пеш аз ҳодисаи сӯхтор оварда, баъди сӯхтор аввалин шуда, ба муҳофизон хабар додааст. Ӯ қаблан низ дар суҳбат бо наздиконаш аз нияти худкушӣ суҳбат кардааст.”

Пулиси Саратов инчунин мегӯяд, вақти даст задан ба сӯхтор ин зан дар ҳолати мастӣ қарор доштааст. Ба иттилои мақомоти пулиси Русия ин зан шаҳрвандии Тоҷикистонро дошта, соли 2002-юм аз Узбакистон ба Саратов рафтааст. Мақомоти рус мегӯянд ба Минигалеева то 5 соли зиндон таҳдид мекунад.

Мӯҳр

Хабарҳои монанд: