23 янв 2015 15:18Тоҷикистон / Иқтисодӣ

Сӯиистифодаи мансабдор аз нооромӣ дар Исфара ва фирор ба Русия

Корхонаи воҳиди давлатии “Тоҷикагролизинг” сӯиистифодаи як мансабдори воломақоми ин ниҳод аз мавқеъ, фурӯши амвол ба шаҳрванди Қирғизистон ва фирораш ба Русияро шарҳ дод.

Нуралӣ Акрамов, сардори шуъбаи ҳуқуқ, кадр ва коргузории “Тоҷикагролизинг” дар посух ба суоли “Озодагон” гуфт, охири соли гузашта Аскар Шарифов собиқ раиси ин ниҳод барои сӯиистифодааш аз мавқеъ ва фурӯши моликияти давлатӣ ба сокини Қирғизистон дар Исфара боздошт шуд.

Акрамов изҳор дошт, ки Шарифов дар маҷмуъ одами хуб ва кораш ҳам хуб буд: “Аммо ба фикри шахсии ман нооромиҳое, ки дар Исфара ба амал омад ва шояд Аскар Шарифов низ гумон кард, ки вазъият хуб намешавад ва ӯро намекобанд, ҳамин тариқ бо мақсади пулкоркунӣ амволи корхона - 1 трактор ва як комбайнро фурӯхта, боқимонда амволи корхонаро бесоҳиб гузошта ба Русия фирор кард.”

Акрамов Нуралӣ афзуд, баъди оне, ки аз қазия хабардор шудаанд, ба додситонӣ муроҷиат намудаанд ва Шарифов аз ҷониби мақомот дастгир шуд: “Ҳоло Аскар Шарифов дар боздоштгоҳ аст ва нисбаташ парвандаи ҷиноӣ аз тарафи прокуратура, сарҳадот ва Вазорати мудофиа мавриди санҷиш қарор дода шудааст.”

Масъули “Тоҷикагролизинг” афзуд, ки дар мавриди амволи фурӯхташуда ба шаҳрванди Қирғизистон, феълан гуфтушунид идома дорад ва он ба наздикӣ баргардонида мешавад.

Қаблан ВКД хабар дода буд, ки Аскар Шарифов, сокини 38-солаи ноҳияи Исфара, собиқ сардори “Тоҷикагролизинг” моҳи январи соли 2014 бо сӯиистифода аз мансабаш, дидаю дониста, барои 1 адад трактори тамғаи “Тоҷирон”, ки ба корхонаи мазкур барои истифода дода шудааст, ҳуҷҷатҳои тақаллубӣ омода карда, аз худ намудааст. Ӯ дар пайи тайёр намудани асноди тақаллубӣ тракторро ба шаҳрванди Қирғизистон, Одилов Абдувосит, соли таваллудаш 1970 ба маблағи 15 000 доллари амрикоӣ фурӯхта, маблағи онро ба эҳтиёҷоти худ сарф намудааст.

Мӯҳр

Хабарҳои монанд: