Суҳбати ошкорои сафири Русия: Аз баҳси Роғун то англисӣ ба ҷои русӣ
Игор Лякин-Фролов, сафири Русия дар Тоҷикистон мегӯяд, миёни ин ду кишвар мушкилоти ҳалнашуданӣ вуҷуд надорад. Ӯ дар суҳбат бо “РИА Новости” асоси шарикии стратегии Русия ва Тоҷикистонро вобаста будани ин кишварҳо аз ҳамдигар хондааст.
Ба гуфтаи Лякин-Фролов Тоҷикистон барои Русия форпост ё худ посгоҳ аст, ки аз амнияти марзҳои он амнияти Русия вобастагӣ дорад: “Амнияти Русия аз муҳофизат шудани марзи Тоҷикистон бо Афғонистон ва қавӣ будани нерӯҳои мусалаҳи Тоҷикистон вобаста аст. Аз ҷониби дигар Тоҷикистон аз бисёр ҷиҳат аз Русия вобаста аст. Аз ҷумла ҳудуди 1 миллион муҳоҷири кории тоҷик дар Русия кор мекунаду чоряки тиҷорати байналмилалии Тоҷикистон ба Русия рост меояд. Ба ғайр аз ин ҳазорон мутахассиси тоҷик таҳсилдидаи Русия мебошанд.”
Сафир дар робита ба мақоми забони русӣ гуфтааст, ҳарчанд талабот ҳанӯз ба забони русӣ зиёд аст, вақтҳои охир ҷойи он танг шуда истодааст: “Мутаассифона бояд қайд кунам, ки муҳити истифодаи забони русӣ рӯз аз рӯз тангтар шуда истодааст. Теъдоди тоҷикистониёне, ки забони русиро медонанд, майли камшавӣ дорад. Аз бисёр ҷиҳат ин ба он вобастагӣ дорад, ки Тоҷикистонро даҳҳо ҳазор сокини русзабон тарк карданд ва нафаре нест, ки мактаббачаҳо бо ӯ бо забони русӣ гап зананд. Имрӯз суҳбатҳо бо забони русӣ дар кӯчаю ҷойҳои ҷамъиятӣ камтар ба гӯш мерасанд. Аҳамият додам, ки дар Душанбе низ шиору овезаҳо бо забони русӣ кам шудаанд. Ниҳодҳои давлатӣ дар бисёри ҳолатҳо бо овезаҳо бо забони тоҷикӣ иктифо мекунанд.”
Сафири Русия дар Тоҷикистон бо зикри ин раванд аз он изҳори таассуф кардааст, ки дар Тоҷикистон овезаю шиорҳо бо забони англисӣ майли афзоиш доранд: “Дар ҳоле ки тибқи Сарқонун ва дигар анъанаҳое, ки дорем овезаю шиорҳо бояд бо забони тоҷикию русӣ бошанд. Зарур аст, ки дар барномаҳои мактабӣ низ таваҷҷуҳ ба забони русӣ бештар шаваду соатҳои таълими забони русӣ зиёд карда шаванд.”
Дар мавриди вуруди Тоҷикистон ба Иттиҳоди АвруОсиё, Фролов изҳор доштааст, ин ҳақ ва интихоби давлати Тоҷикистон аст, “вале ба фикри ман Тоҷикистон аз узвият дар ин созмон бештар бурд хоҳад кард, на бохт.”
Фролов инчунин дар шарҳи даъвои мақомоти Тоҷикистон алайҳи андозгурезии ширкатҳои русӣ, аз ҷумла “Мегафон”, “Билайн” ва “Созидание”, зикр кардааст, ки Русия бо вуҷуди мушкилоти иқтисодияш ҳамоно калонтарин сармоягузори Тоҷикистон аст: “Албатта бархе ширкатҳои фаъоли русӣ дар Тоҷикистон ба мушкилот дучор мешаванд, ки ин пеш аз ҳама ба қонунгузории зуд-зуд ивазшаванда дар соҳаи андозбандӣ рабт дорад. Дар маҷмуъ фазои сармоягузорию соҳибкорӣ дар Тоҷикистон беҳбудӣ мехоҳад ва тавре ба назар мерасад, мақомоти тоҷик ҳам барои он талош доранд.”
Дар посух ба суол, ки Русия дар мавриди Роғун чӣ мавқеи мушаххас дорад, Игор Лякин-Фролов изҳор доштааст, “мо ба хубӣ дарк мекунем, ки шарикони тоҷики мо чӣ аҳамиятеро барои бунёди нерӯгоҳи Роғун қоиланд. Ин нерӯгоҳ метавонад воқеан ба истиқлоли барқии кишвар мусоидат кунад, дар ҳоле ки хулосаи мусбати Бонки ҷаҳонӣ низ дар ин маврид вуҷуд дорад. Мо ҳаққи дӯстонамонро барои бунёди ин нерӯгоҳ эҳтиром мекунем. Дар маҷмуъ Роғун метавонад, майдони ҳамкории байналмилалӣ ва минтақавӣ шаваду барои ҳалли масоили энергетикию обӣ дар минтақаи Осиёи Марказӣ хидмат кунад.”
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |