10 мар 2015 13:42Тоҷикистон / Иҷтимоӣ

Боздошти мудири лабараторияи Донишгоҳи тиҷорати Хуҷанд барои қаллобӣ

Оҷонсии мубориза бо фасоди молии Тоҷикистон аз боздошти Фаридун Муминов, мудири лабараторияи Донишгоҳи давлатии тиҷорати Тоҷикистон дар шаҳри Хуҷанд хабар дод, ки дар қаллобӣ муттаҳам мешавад.

Тибқи иттилои Оҷонсӣ, Фаридун Муминов охири моҳи августи соли 2010 ҳангоми дар Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанди вилояти Суғд қарор доштанаш аз ду донишҷӯи донишгоҳи мазкур - Холиқов Д.Р., ва Ҳоҷиев З.С. дар ҳаҷми 1000 доллари амрикоӣ маблағ гирифта, онҳоро ба гуруҳи рӯзонаи ихтисоси “Иқтисоди ҷаҳон”-и Донишкадаи иқтисод ва савдои Донишгоҳи давлатии тиҷоратии шаҳри Хуҷанд гузаронидааст. Манбаъ мегӯяд, “боздоштшуда дидаю дониста, ки иҷрои ин амал ба ваколати хизматии ӯ дохил намешавад, хоҳиши донишҷӯёнро барои ба дигар гуруҳ гузаштанашон рад накарда, аз онҳо дастрас намудани як қатор ҳуҷҷатҳои заруриро вобаста ба интиқолашон ва ҳамчунин аз ҳар кадоме барои иҷрои ин кор овардани маблағи пулии 500 доллари ИМА, ҷамъ 1000 долларро талаб намудааст”.

Оҷонсӣ мегӯяд, Фаридун Муминов маблағро ба эҳтиёҷоти шахсияш сарф намуда, ба Донишкадаи иқтисод ва савдои Донишгоҳи давлатии тиҷоратӣ дар Хуҷанд, барои гирифтани фарқиятҳои санҷишҳо маблағе насупоридааст: “Дар натиҷа аз ҷониби маъмурияти донишгоҳи мазкур ба ин ду донишҷӯ бо далели пардохт накардани маблағи фарқиятҳо ба хазинаи донишгоҳ барои супоридани санҷишу имтиҳонҳо иҷозат дода нашудааст”.

Ба иттилои манбаъ, Фаридун Муминов худро дар содир намудани ҷиноят бо моддаи 247 қисми 2 бандҳои “в,г”-и Кодекси ҷиноятӣ пурра гунаҳгор ҳисобида, зарари ба донишҷӯён расонидаро пурра таллофӣ карда ва нисбати ӯ бо татбиқи қонун "Дар бораи авф" оғози парвандаи ҷиноятӣ рад шудааст.

Мӯҳр

Хабарҳои монанд: