Ҷаҳон дар якуми апрел
Гирдоваранда ҳақиқатнигор Сайф САФАР
Ислом Каримов, раиси ҷумҳури Узбакистон, натиҷаи ахири интихоботи кишварашро қабул надорад. Ӯ бо нишони эътироз ба тақаллубкории Кумитаи марказии интихоботи Узбакистон супориш додааст, дар наздиктарин фурсат раъйи мардумро бо шаффофтарин роҳ ҳисоб кунанд ва ҳақро ба ҳақдор бирасонанд. Оқои Каримов ҳамчунон гуфтааст, дар сурати иҷро нашудани ин амр аз симматаш истеъфо медиҳад. Ин раиси ҷумҳури дарозумри Узбакистон ин амалкардашро ба хотири ниҳодина сохтани демократия дар кишвар ва минтақа шарҳ додааст. Ӯ инчунин бо хитоб ба тамоми раис ҷумҳурони Осиёи Марказӣ гуфтааст, аз ин тасмимаш пайравӣ кунанд ва сатҳи тақалубро дар интихоботҳо поин баранд. Каримов дар ин баёния ба робитаи кишавараш бо Тоҷикистон ҳам ишора карда, гуфтааст, ӯ ба раиси ҷумҳури ояндаи ин кишвараш маслиҳат медиҳад, муносиботро бо Тоҷикистон хуб ба роҳ монад. Ба таъкиди Каримов раиси ҷумҳури ояндаи Узбакистон бояд хати парвоз ва роҳи оҳани бору колро бо Тоҷикистон барқарор созад. Талош кунад, барои лағви виза шароит фароҳам шавад. Мактабҳои тоҷикиро дар шаҳрҳои тоҷикнишини ин кишвар бунёд кунад ва барои сохтани НОБ-и Роғун мухолифат накунад.
Арабистони Саудӣ, ки чанд рӯз пеш бо эътилофи иттиҳодияи давлатҳои Халиҷи Форс ба кишвари Яман ҳуҷум кард, аз ин тасмимаш даст кашидааст. Шоҳи Арабистон Салмон ибни Абдулазиз дар нишасти хабарӣ гуфтааст, ин корро ба хотири ваҳдати исломӣ кардааст. Шоҳ изҳор доштааст, “Мӯъмин бародари мӯъмин аст!” ва уммати Ислом бояд ба душманонаш фурсат надиҳад аз муноқишаҳои байни мусулмонон табли шодӣ зананд. Ҷаноби Салмон бо сароҳат таъкид кардааст, ки агар Амрико ба ин иқдомаш мухолифат кунад сафирашро аз ин кишвар бозхонд мекунад ва тамоми равобиташро бо Вашингтон қатъ мекунад. Ӯ ваъда додааст, “минбаъд фурӯши нафти Арабистонро ба кишварҳои ғарбӣ кам мекунем ва аз ин ҳисоб онро ба кишварҳои бо арзонтарин нарх ба давлатҳои мусулмоннишин мефурӯшем”.
Музокироти ҳастаии Эрон ба нафъи ин кишвари анҷомид. Конгреси Амрико гуфтааст, Эрон аз ин ба баъд дар ғанисозии ураниум ба роҳатӣ вориди амал шавад. Мақомдорони конгреси Амрико ҳатто ваъда додаанд, ба Муҳаммадҷавод Зариф, вазири умури хориҷаи Эрон, талафи вақт тайи 1,5 соли раванди музокира ва “моральный ущерб”-ҷуброн мекунад. Дар ҳамин ҳол Оятуллоҳ Алии Хоминаӣ, раҳбари Эрон, ин суханони Конгрес истиқбол карда, гуфтааст, дар зудтарин фурсат ба Амрико сафар мекунад ва боз шудани сафоратҳояшонро дар миён мегузорад.
Раиси ҷумҳури Русия, Владимир Путин, гуфтааст, мақсад дорад дар 1-умин солгарди пайвастани Қрим ба Русия онро дубора бозмегардонад. Ӯ дар ин бора ба расонаҳо гуфтааст, ки дар ин замина бо аъзои кобинаи ҳукуматаш дар ҳоли гуфтугӯ аст ва бо расидан ба тавофуқ ин тасмимашро амалӣ мекунад.
Абубакри ал Бағдодӣ, раҳбари “Давлати исломӣ” ё ҳамон ДИИШ намояндаи Тоҷикистон, Абухолиди Кӯлобиро ба ҳузур пазируфта, як ҷомаву тоқӣ ва миёнбанди гулдузӣ туҳфа гирифтааст.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |