Муродалӣ Алимардон раиси "Агроинвестбонк" таъин шуд
Муродалӣ Алимардон, ки имрӯз, 1-уми апрел бо фармони раисиҷумҳури Тоҷикистон аз вазифаи муовини сарвазир барканор шуд, бо қарори Шӯрои нозирони “Агроинвестбонк” раиси ин бонк таъин гардидааст. Ӯ дар ин мақом Суюнхон Рустамовро иваз кард, ки аз моҳи декабри соли 2013 роҳбарии “Агроинвестбонк”-ро ба уҳда дошт.
Муродалӣ Алимардон, ки яке аз шахсиятҳои калидии ҳукумати Эмомалӣ Раҳмон ба ҳисоб меравад, соли 1983 шӯъбаи молиявии Донишгоҳи давлатии Тоҷикистонро хатм карда, аз соли 1983 дар филиали “Агробонк”-и Чептура кор кардааст. Соли 1991 ба ҳайси идоракунандаи шӯъбаи “Агробонк”-и ноҳияи Ҳисор фаъолият намудааст. Аз охири соли 1993 чун президенти Бонки саноати аграрии “Шарқ” адои вазифа кардааст. Аз декабри соли 1996 то соли 2008 ба ҳайси раиси Бонки миллии Ҷумҳурии Тоҷикистон кор кардааст.
Ин тағйирот дар ҳолест, ки ду соли пеш Сандуқи Байналмилалии Пул (СБП) бо нашри як гузориш дар мавриди “Агроинвестбонк” гуфт, ин бонк, ки соли 2012 дар остонаи муфлисшавӣ қарор дошту давлат онро “наҷот” дод, ҳанӯз ҳам дар ҳолати ногувор қарор дорад. СБП ду соли пеш гуфта буд, ки бо вуҷуди рекапитализатсияи “Агроинвестбонк” ва садҳо миллион саҳми давлат, дар ин бонк ҳанӯз ҳам норасоии маблағ ҷой дорад. Сандуқи Байналмилалии Пул “Агроинвестбонк”-ро бори зиёдатӣ барои буҷаи давлат арзёбӣ карда, пешниҳод карда буд, барои ба эътидол овардани вазъи ин бонк мутахассисони хориҷӣ ҷалб гарданд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |