22 апр 2015 18:35Оcиёи Марказӣ / Тоҷикистон

АКС: Ташхиси минаҳои зеризаминӣ дар озмуни литсейҳои тоҷикӣ-туркӣ

Дар литсей-интернати муштараки тоҷикӣ-туркии иқтисодии шаҳри Душанбе санаи 18-уми апрели соли ҷорӣ озмуни TASPO (озмуни лоиҳаҳои илмии Тоҷикистон) бо иштироки 134 нафар хонанда баргузор гардид, ки 24 нафар ғолиб эълон шуданд.

Озмуни мазкур заминаи омодагӣ ба олимпиадаҳои лоиҳавии байналмилалӣ маҳсуб ёфта, ғолибон метавонанд дар олимпиадаҳои лоиҳавии байналмилалӣ, ки аз фанҳои физика, химия, биология, экология, технологияи иттилоотӣ ва математика бо забони англисӣ сурат мегирад, ширкат варзанд.

Абдусаттор Наҷмиддинов, намояндаи Вазорати маориф ва илм ва мудири кулли литсей-интернатҳои тоҷикӣ-туркӣ зикр намуд, ки мудирияти кулли литсей-интернатҳои муштараки тоҷикӣ-туркӣ бо мақсади такомули тафаккури хонандагон, бедор намудани шавқу рағбати онҳо дар навиштани рисолаҳои илмӣ, гузаронидани тадқиқотҳои илмӣ, зинаҳои аввали ихтироъкорӣ (татбиқи донишҳои назариявӣ), ёфтани роҳҳои ҳалли масъалаҳои ҳалталаби ҳаёт, татбиқи комёбиҳои соҳаҳои гуногуни илм дар пешбурди тараққиёти хоҷагии халқ - саноат, энергетика, кишоварзӣ, экологӣ ва ғайра озмуни лоиҳаҳои илмӣ ва ихтироъкориро ташкил намудааст.

Нисбат ба солҳои қабл иштироки духтарон ҳам дар олимпиада фаъол буд.

Шаҳноза Абдулҳамидова ва Амина Шербоева, хонандагони синфи 9-уми литсей интернати тоҷикӣ – туркии иқтисодии шаҳри Душанбе, бо лоиҳаи муштараки истифодаи энергияи сарфшуда ҳангоми об шудани металҳои дар корхонаҳои металҳои ранга ширкат карданд. Муборакшо ва Исфандиёр, хонандагони синфи 10 литсей-интернати тоҷикӣ- туркии шаҳри Қўрғонтеппа, лоиҳаи ташхиси минаҳои зеризаминиро пешниҳод карданд.

- Мо тақрибан ҳисоб кардем, ки дар як сол 2 ҳазор нафар аз минаҳои зеризаминӣ ҳалок мешаванд. Воситаи ташхиси мо минаҳоро дар масофаи 100 метр ҳис мекунад. Ва бо таври автоматӣ суръати ҳаракат суст мешавад. Бо расидан ба масофаи 10 метр нақлиёт меистад. - гуфт Муборакшо.
Дар озмун лоиҳаҳои техникии саноатӣ, инноватсионӣ, барномасози компютерӣ, филмсоз ва ғайра муаррифӣ шуданд.

Дар озмун 27 лоиҳаи илмӣ, 19 лоиҳаи ТИК (компютерӣ) ва 22 лоиҳаи ихтироот аз ҷониби хонандагони литсей-интернати муштараки тоҷикӣ-туркии ба номи Мавлоно Ҷалолуддини Румии шаҳри Қурғонтеппа, литсей-интернатҳои муштараки тоҷикӣ-туркии шаҳрҳои Турсунзода, Хуҷанд, Кўлоб, литсей-интернати муштараки тоҷикӣ-туркии иқтисодии шаҳри Душанбе, литсей-интернати муштараки тоҷикӣ-туркии ба номи Ҳоҷӣ Камол, мактаби байналмилалии шаҳри Душанбе, гимназияи Ворисони шаҳри Турсунзода, литсейи №1 барои хонандагони болаёқати шаҳри Душанбе, литсейи Донишгоҳи давлатии тиҷорати Тоҷикистон ва литсейи Президентии шаҳри Турсунзода пешниҳод гардид, ки дар натиҷа 11 лоиҳа ҷойи якум, 18 лоиҳа ҷойи дуюм ва 24 лоиҳа ҷойи сеюмро сазовор шуданд.

Аз руйи бартарияти медалҳои ба дастовардашуда, ҷойи якум насиби хонандагони литсей-интернати муштараки тоҷикӣ-туркии ба номи Мавлоно Ҷалолуддини Румии шаҳри Қӯрғонтеппа, ҷойи дуюм насиби хонандагони литсей-интернати муштараки тоҷикӣ-туркии иқтисодии шаҳри Душанбе ва ҷойи сеюм насиби хонандагони литсей-интернати муштараки тоҷикӣ-туркии шаҳри Хуҷанд гардид.

То имрўз хонандагони литсей-интернатҳои муштараки тоҷикӣ-туркӣ ва мактаби байналмилалии шаҳри Душанбе дар олимпиадаҳои фаннию лоиҳавии байналмилалӣ иштирок карда, соҳиби 610 ҷойи ифтихорӣ, 110 медали тилло, 165 медали нуқра ва 335 медали биринҷӣ гардидаанд.