04 май 2015 13:16Тоҷикистон / Муҳоҷир

Муҳоҷирони баргашта аз Русия: Ҳаминҷо кор кардан мехоҳем

Хадамоти муҳоҷирати Тоҷикистон мегӯяд, дар пайи як мониторинг дар бозори меҳнат маълум кард, танҳо 29 дар сади афроде, ки дар бозори мардикорӣ кор меҷӯянд, соҳиби касбу кори муайян мебошанд.

Абдулло Қодирӣ, сухангӯи ин ниҳод ба “Озодагон” гуфт, бо мақсади шинос шудан бо вазъи бозори дохилии меҳнат, муайян намудани мушкилоти коргарони кироя ва мусоидат ба ҳалли мушкилоти онҳо рӯзи 29 апрел дар бозори меҳнати шаҳри Хуҷанд мониторинг гузаронида шуд. Ба қавли ӯ, дар рафти мониторинг наздики 100 мардикор, сокинони шаҳру ноҳияҳои Хуҷанд, Қайроққум, Панҷакент, Ғончӣ, Зафаробод, Айнӣ, Бобоҷон Ғафуров, Ҷаббор Расулов, Спитамен пурсида шуданд: “Аз шумораи умумии пурсидашудаҳо 16 дарсад сокинони шаҳрҳои Душанбею Кӯлоб ва ноҳияҳои Ҳисору Носири Хисрав будаанд”.

Манбаъ мегӯяд, ҳамаи нафарони пурсидашуда иброз доштанд, ки сабаби асосии мардикорӣ карданашон надоштани ҷои кори расмӣ мебошад ва онҳо маҷбуранд, барои пешбурди зиндагӣ ва бекор нагаштан, мардикорӣ кунанд: “Мониторинг нишон дод, ки маоши якрӯзаи онҳо ба ҳисоби миёна аз 50 то 80 сомониро ташкил медиҳад. Онҳо новобаста ба касбу ҳунар доштан ё надоштанашон корҳои гуногунро иҷро менамоянд. Пурсиши гузаронидашуда нишон дод, ки ҳамаги 29%-и мардикорон соҳиби касбу кори муайян мебошанд. Вале на ҳамаи онҳо мувофиқи ихтисосу касбашон дар мардикорбозор ҷои кор меёбанд”.

Абдулло Қодирӣ мегӯяд, 21 дарсади афроди пурсидашуда гуфаанд, қаблан дар муҳоҷирати меҳнатӣ буданд ва ҳоло хоҳиши ба Русия рафтан надоранд, зеро дар пайи беқурб шудани пули русӣ музди меҳнаташон ночиз шуд: “Баръакс, 18%-и пурсидашудагоне, ки ягон бор ба Русия нарафтаанд, гуфтанд, ки мехоҳанд ба ин давлат раванд. Новобаста ба ин, аксари мардикорон хоҳишманди онанд, ки дар ҷои истиқомати доимиашон ҷои кор ёбанд ва дар назди оилаи худ қарор дошта бошанд”.

Ба иттилои манбаъ, пурсиш маълум намуд, ки мардикорони аз шаҳру ноҳияҳо омада, асосан дар хонаҳои шахсии дигар одамон зиндагӣ мекунанд ва ҳар рӯз ба миқдори муайян ба соҳиби хона маблағ медиҳанд.

Мӯҳр

Хабарҳои монанд: