Шикояти муовини Кабирӣ ба Ализода аз поймолшавии ҳуқуқи диндорон
Сайдумар Ҳусайнӣ, муовини аввали раиси Ҳизби наҳзати исломии Тоҷикистон бо навиштани як нома унвонии Зариф Ализода, ваколатдор оид ба ҳуқуқи инсон аз поймолшавии ҳуқуқу озодиҳои инсон, аз ҷумла диндорон дар кишвар шикоят кардааст.
Муовини аввали раиси ҲНИТ дар номаи худ навиштааст, “агар пештар ин фишорҳо маҳдуд ба аъзои ҲНИТ мешуданд, ҳоло доманаи ин фишорҳо ба тамоми ришдорону сатрпӯшҳо ҳам густариш ёфтааст”.
Ба гуфтаи Сайдумар Ҳусайнӣ, аз давраи баргузории интихоботи парлумонии якуми март то ҳол қонунгузории кишвар аз тарафи мақомоти иҷроияи маҳаллӣ, шӯъбаҳои Кумитаи давлатии амнияти миллӣ ва Вазорати умури дохилии кишвар дар маҳалҳо ба таври оммавӣ нодида гирифта шуда, ҳуқуқу озодиҳои шаҳрвандон ошкоро поймол мешавад: “Бо назардошти талаботи моддаи 11, қисми а ва б-и Қонуни Ҷумҳурии Тоҷикистон "Дар бораи Ваколатдор оид ба ҳуқуқи инсон дар ҷумҳурии Тоҷикистон”, ки риояи ҳуқуқу озодиҳои инсон ва шаҳрванд, барқарор намудани ҳуқуқу озодиҳои вайроншудаи инсон ва шаҳрвандро пешбинӣ кардаааст, роҳбарияти Ҳизби наҳзати исломии Тоҷикистон лозим донист, то ба Шумо муроҷиат намояд”.
Муовини раиси ҲНИТ гуфтааст, дар ҳоле аз ваколатдор оид ба ҳуқуқи инсони тоҷик шикоят дорад, ки қаблан унвонии раҳбарони мақомоти ҳифзи ҳуқуқи кишвар ҳам чунин мактубҳо ирсол карда буд: “Дар асоси моддаи 13-и Қонуни Ҷумҳурии Тоҷикистон "Дар бораи Ваколатдор оид ба ҳуқуқи инсон дар Ҷумҳурии Тоҷикистон”, ки ба ин ниҳоди мудофеъи ҳуқуқи инсон ваколат ва салоҳияти комил ҳангоми гирифтани маълумот оид ба вайронкунии оммавӣ ва ҷиддии ҳуқуқу озодиҳои инсон ва шаҳрванд ё дар ҳолатҳои аҳамияти махсуси ҷамъиятӣ доштани ин амалҳо додааст, то дар доираи салоҳияташ бо ташаббуси худ санҷишҳо гузаронад. Аммо ин рисолати Ваколатдор ҳанӯз ҳам анҷом нашуда боқӣ мондааст”.
Дар номаи муовини раиси ҲНИТ ҳолатҳои қонуншиканӣ аз сӯи кормандони ниҳодҳои мазкур тайи ду моҳи охир замима гардида, ибрози умедворӣ шудааст, ки “Ваколатдор дар доираи салоҳияту ваколате, ки қонунгузории кишвар бар ӯҳдааш вогузор кардааст, чораҷӯӣ намуда, барои барқарор намудани ҳуқуқу озодиҳои шаҳрвандон хулосабардорӣ менамояд”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |