Донишгоҳи Хуҷандро донишҷӯён “идора” мекунанд
Барои аввалин бор, дар Донишгоҳи давлатии Хуҷанд ба номи академик Бобоҷон Ғафуров “Ҳафтаи иштироки донишҷӯён дар идоракунии Раёсати донишгоҳ ва факултаҳои он” гузаронида мешавад.
Тавре ба хабаргузории “Озодагон” аз Маркази иттилоот ва таҳлили раёсати донишгоҳ иттилоъ доданд, ин чорабинӣ аз 4 то 11 майи соли равон идома мекунад. Анвар Мақсудов, ректори донишгоҳ ҳадафи роҳандозии ин иқдомро татбиқи қонунҳои Тоҷикисон “Дар бораи маориф”, “Дар бораи ҷавонон ва сиёсати давлатии ҷавонон” арзёбӣ кардааст: “Ин чорабинӣ бо мақсади баланд бардоштани самаранокии сиёсати давлат нисбат ба ҷавонон, шиноскунии донишҷӯён бо низоми корбарӣ ва идоракунии Раёсати Донишгоҳи давлатии Хуҷанд ба номи академик Бобоҷон Ғафуров, ҷалби онҳо ба фаъолияти амалии муассисаи таълимӣ бахшида ба Рӯзи ҷавонони Тоҷикистон, гузаронда мешавад”.
Манбаъ афзуд, аллакай комиссияи салоҳиятнок тариқи суҳбат донишҷӯёнро муайян ва интихоб намуда, ҷиҳати дар сатҳи баланди ташкилӣ гузаронидани чорабинӣ тадбирҳои амалӣ андешидаанд: “Сардорони раёсатҳо, мудирони шӯъбаҳо ва декани факултетҳои донишгоҳ барои иштирокчиёни ҳафта тибқи қонунгузории Ҷумҳурии Тоҷикистон шароити мусоид фароҳам меоранд”.
Гуфта мешавад, давоми 2 рӯз 4-соатӣ машғулият/тренинг дар мавзӯъҳои “Худидоракунӣ, мафҳум ва мазмуни он” ва “Этикаи рафтори кадрҳои идоракунанда”, гузаронида мешавад. Инчунин давоми ду рӯз шиносоӣ бо роҳбарону фаъолияти Раёсату шуъбаҳои ДДХ, 6 рӯз иштироки бевоситаи донишҷӯён дар иҷрои вазифа: роҳбар ҳар рӯз ду маротиба - як маротиба то нисфирўзӣ ва як маротиба баъди нисфирӯзӣ, ба донишҷӯи ӯро ивазкунанда шароит медиҳад, ки дар раванди ҳалли яке аз масъалаҳо мустақилона иштирок намояд: “Дар дигар ҳолат роҳбар - дублёри ҷавон дар паҳлӯи роҳбар нишаста, бо фаъолияти вай шинос мешавад, дар рӯзномааш қайдҳои худро дар бораи рафтори роҳбар ва тарзи ҳалли масъалаҳо аз тарафи роҳбар мегузаронад. Ҳар рӯз роҳбар дар оғози фаъолияти корӣ натиҷаҳои иҷрои супоришҳои рӯзи гузаштаро бо иштироки роҳбар - дублёри ҷавон мегузаронад, то ин ки ӯ масъулиятро ҳис намояд”.
Иштирокчиёни “Ҳафта” оид ба иштирок ва иҷрои вазифа дар Раёсати донишгоҳ дар ҳаҷми 2-3 саҳифа ҳисобот пешниҳод менамояд ва ба онҳо гувоҳнома оиди иштирок дар “Ҳафта худидоракунии Раёсати донишгоҳ” дода мешавад: “Ҳамин тавр, 45 донишҷӯ ҳафтаи равон дар вазифаҳои гуногун аз ҷумла ректор, муовинони ӯ, сардорони раёсатҳо, мудирони шуъбаҳои раёсат, деканҳо ва мудирони кафедраҳои донишгоҳ фаъолият менамоянд”.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |