08 май 2015 12:11Тоҷикистон / Қазияи Зайд Саидов / Сиёсат / Тема дня

Даъвогари ветнамӣ алайҳи З. Саидов ба судя бовар надорад

Хоанг Ван Хиеп, тоҷири ветнамӣ, ки дар асоси даъвояш алайҳи Зайд Саидов, соҳибкори маҳкумшудаи тоҷик парвандаи нав оғоз гардида буд, дар мурофиаи додгоҳӣ изҳор доштааст, ки ба судяи раисикунанда боварӣ надорад.

Дар ин бора ба “Озодагон” Исҳоқ Табаров, вакили дифои Зайд Саидов хабар дода, афзуд, ки суолҳои кунҷковонаи раисикунандаи мурофиа боиси норозигии тоҷири ветнамӣ шудаанд: “Ба Хоанг Ван Хиеп, ки раҳбари корхонаи муштараки Тоҷикистону Ветнам “Абрешим” аст, саволҳои мушаххас ва кунҷковонаи раисикунандаи мурофиаи додгоҳӣ маъқул нашудаанд. Ин шаҳрванди ветнамӣ ҳамчун ҷабрдида пурсида шуд ва вақти нишондод доданаш саволҳои зиёд ба миён омадаанд, аз ҷумла раисикунандаи мурофиа барои муайян кардани ҳолати кор бисёр кунҷковона савол дод. Дар натиҷа тоҷири ветнамӣ ба додрас изҳори нобоварӣ карда, ба Додгоҳи олӣ дар ин маврид дархост ирсол кардааст”.

Табаров афзуд, ки дар мурофиа фикри тарафҳо дар хусуси дархости Хоанг Ван Хиеп пурсид, ки касе ҷонибдорӣ накард ва қарор бароварда шуд, ки рад карда шавад.

Феълан раисӣ дар мурофиаи додгоҳии парвандаҳои нави Зайд Саидовро додраси Додгоҳи Олӣ Савриддин Тошев ба уҳда дорад.

Нобоварӣ ба Тошев дар ҳолест, ки қаблан ин шаҳрванди ветнамӣ ба Оҷонсии мубориза ба фасоди молии Тоҷикистон шикоят намуд, ки гӯиё корхонаи “Тоҷикатлас” дар тобеияти корхонаи “Абрешим” буд ва онро Зайд Саидов бо роҳи ғайриқонунӣ гирифтааст. Исҳоқ Табаров мегӯяд, зерҳимояаш Зайд Саидов даъвои шаҳрванди ветнамиро дар хусуси “Тоҷикатлас” комилан беасос хондааст.

Вакили дифоъ дар мавриди парвандаҳои нави Зайд Саидов илова намуд, ки ҳудуди 20 рӯз дар мурофиаҳои додгоҳӣ қариб 40%-и шоҳидон пурсида шудаанд: “Феълан мурофиаҳо идома доранд”.

Мӯҳр

Хабарҳои монанд: