Оҷонсии мубориз бо фасоди Тоҷикистон ҷузъиёти боздошти сардори нозироти андози ноҳияи Фирдавсиро, ки ҳафтае пеш бо иттиҳоми фасодкорӣ дастгир гардид, ифшо намуд.
Тавре аз ин ниҳод ба “Озодагон” иттилоъ доданд, сардори нозироти андози ноҳияи Фирдавсӣ соҳибкорро маҷбур кардааст, ки барои ошхонаи бӯстонсарояш дар ноҳияи Варзоб ҷевони 1500 долларӣ харида, насб кунад. Манбаъ мегӯяд, дар натиҷаи чорабиниҳои оперативӣ-ҷустуҷӯӣ маълум гардид, ки сардори нозироти андоз ва мутахассиси пешбари гуруҳи хизматрасонӣ бо соҳибкорони инфиродии ноҳияи Фирдавсӣ, роҳи тамаъҷуиро пеша намудаанд: "Онҳо барои қатъ намудани фаъолияти соҳибкории шаҳрванд "А", ки бевосита ба доираи ваколатҳои хизматиаш дохил мебошад, бо маслиҳати пешакӣ, ғайриқонунӣ санади қатъшудаи соҳибкориро то 26 январи соли 2015 дар худ нигоҳ дошта, соҳибкор "А"-ро қасдан ба чунин ҳолате гузоштанд, ки маҷбур шуд то барои ҳалли кораш ба онҳо пора диҳад”.
Оҷонсии мубориза бо фасод афзуд, санаи 4 майи соли 2015 соҳибкор "А", бар ивази гирифтани маълумотнома оиди катъ намудани фаъолияти соҳибкориаш, маҷбуран ба талаби шахсони мансабдори номбурда розӣ шуда, барои ошхонаи бӯстонсарои сардори Нозироти андоз дар ноҳияи Фирдавсии шаҳри Душанбе, ки дар ноҳияи Варзоб, воқеъ аст, ҷевони ошхона бо арзиши 1500 доллар бурда, васл намудааст.
Ба иттилои Оҷонсӣ, феълан аз рӯи ин ҳодиса нисбати сардори Нозироти андоз дар ноҳияи Фирдавсии шаҳри Душанбе ва мутахассиси пешбари гуруҳи хизматрасонӣ бо соҳибкорони инфиродии ҳамин ноҳия парвандаи ҷиноӣ оғоз гардида, тафтишоти пешакӣ идома дорад. Акси утоқи кории сардори нозироти андози ноҳияи Фирдавсӣ (Манбаъ-саҳифаи фейсбукии Ёқуби Саид)
Мӯҳр