25 май 2015 15:46Оcиёи Марказӣ / Тоҷикистон

Тасмими парлумон барои гузоштани ҳайкали Президент дар пойтахт

Дар Ашқобод, пойтахти Туркманистон имрӯз, 25-уми май, ба муносибати “Рӯзи шаҳр” парда аз рӯи тандис ё худ пайкараи раиси ҷумҳури ин кишвар Қурбонгулӣ Бердимуҳаммадов бардошта шуд.

Ин аввалин тандиси Қурбонгулӣ аст, ки дар таҳсутуни мармарини 15 метра гузошта шудааст ва дар маҷмӯъ 21 метр дарозӣ дорад. Онро наққоши мардумии Туркманистон, Сарат Бабаев аз биринҷ сохтааст, ки бо 24 карат тилло андова шудааст.

Номи расмии ин тандиси Бердимуҳаммадов “Аркадаг Бинаси” ба маънии “пуштибон”, “такягоҳ” омадааст. Раҳбари давлати Туркманистон дар ин тандис бо либосҳои суннатии туркманӣ савори аспи ахалтекӣ бо дасти рости бардошта тасвир шудааст.

Дар паҳлӯи Қурбонгулӣ кабутаре дар парвоз тасвир шудааст, ки намоди талош барои сулҳ гуфта шудааст. Раиси парлумони Туркманистон, Акҷӣ Нурбердиева, гуфтааст, ки қарори гузоштани ин тандисро парлумон қабул кардааст. Дар он қарор қайд шудааст, ки ин тандис дар пайи муроҷиатҳои бешумори шаҳрвандони Туркманистон, ки “ба сиёсати хирадмандонаи дохиливу хориҷии кишвар ва дастоварду обрӯи он дар сатҳи байналмилалӣ ба номи президент Қурбонгулӣ Бердимуҳаммадов бастагӣ дорад”, гузошта шудааст.

“Қаҳрамони мо Аркадаг муҳаббат ва арҷгузории мардумро дар симои сиёсатмадори дурандеш, олими варзида, дорандаи донишҳои васеъ дар соҳаи иқтисод, меъморӣ, маориф, илм, тиб, фарҳанг, ҳунар ва соҳаҳои дигар ба унвони ходими давлативу сиёсии даврони муосир ва намунаи хидмат ба мардум ва Ватан таҷассум кардааст”-гуфтааст Нурбердиева.

Барафрохтани тандиси Қурбонқулӣ Бердимуҳаммадов дар ҳолест, ки худи ӯ замони расидан ба курсии раёсатиҷумҳурӣ дар Туркманистон тамоми ҳайкалу нимпайкараҳои раисиҷумҳури собиқи ин кишвар Сафармурод Ниёзовро барканда буд.