08 июн 2015 20:03Тоҷикистон / Иҷтимоӣ

АКС: Обхезӣ дар Исфара 6 пулу 30 гектар замини киштро обшӯставу валонгор кардааст

Дар пайи фаромадани тармаву омадани сел дар шаҳри Исфара 6 пулу беш аз 30 гектар замини киштзор обшӯставу валонгор шудааст.

Иқбол Тешаев, сухангӯи ҳукумати Исфара рӯзи 8 июн дар суҳбат бо “Озодагон” гуфт, фаромадани тарма дар саргаҳи рӯди Карафшин боиси баланд шудани сатҳи оби дарёи Исфара то 200 метри мукааб шудааст.

Ба гуфтаи ӯ, дар пайи ин баландшавии сатҳи оби дарё дар қисмати ҷанубии деҳаи Ворух, 30 километр болотар аз маҳалли аҳолинишин, обхезӣ ба вуҷуд омадааст, ки “сокинон тайи ду даҳсолаи ахир шабеҳашро дар хотир надоранд ва боиси хароб шудани 6 купруки дохилихоҷагии деҳоти Ворух, Сурх ва купруки марказии деҳаи Чоркуҳ шуда, беш аз 30 гектар киштзор дар минтақаҳои наздисоҳилии деҳоти Ворух, Чоркуҳ, Сурх, Хонобод ва Нафтобод обшуставу валангор шудаанд”.

Инчунин дар пайи ин обхезӣ 14 адад саргаҳу саробгири каналҳои обрасони 5 деҳот ва шаҳри Исфара вайрон шуда, дар масофаи аз 100 то 2000 метрӣ, дар маҷмӯъ дар дарозои 12,8 километр каналҳои ирригатсионӣ бо лоиқаву шағал ва обовардҳо пур шудаанд: “Обхезӣ ҳамчунон боиси осеб дидани такягоҳи хатти баландшиддати барқии 35 кВ-и зеристгоҳи Октябр 110/35/6-10- зеристгоҳи Ворух 35/10, канда шудани ноқилҳо ва қатъ гардидани интиқоли барқ ба деҳаи Ворух гардид”.

Сухангӯи ҳукумати Исфара афзуд, ахбаски саривақт сокинони ин минтақаи кишвар аз омадани сел хабардор шуданду аз маҳалҳои осебпазири наздисоҳилӣ берун бурда шуданд, ин ҳодиса талафоти ҷоние аз худ боқӣ нагузошт ва ҳоло таъминоти мунтазаму бефосилаи сокинони деҳаи Ворух бо қувваи барқ соати 1400-и рӯзи 08 июн шурӯъ гаштааст.