Ҳушдори Абдулқодирзода аз “салафияи ҷиҳодӣ” ва шиаи дувоздаҳимома
Саидмукаррам Абдулқодирзода, раиси Шӯрои уламои Маркази исломии Тоҷикистон сокинони кишварро аз пайдошавии гуруҳҳои нав, ки ҳадафи ноором кардани ҷомеаи кишварро доранд, ҳушдор дод.
Абдулқодирзода рӯзи 19 июн дар хутбаи намози ҷумъа гуфт, “гуруҳҳое наве бо номи салафияи такфирию салафияи ҷиҳодӣ ва шиаи дувоздаҳимома пайдо шудаанд, ки ҳадафи ноором кардани ҷомеаи моро доранд”.
Ӯ яккамазҳабиро омили аслии сулҳу субот дар ҷомеаи мусалмоннишин хонда гуфт, давоми ҳазор соли охир мусулмонони тоҷик аз мазҳаби Ҳанафия пайравӣ кардаанд: “Яккамазҳабӣ омили аслии бародарию ухуват аст, ки он бояд нигаҳ дошта шавад”.
Ин барои аввалин маротиба нест, ки раиси Шӯрои уламон аз намояндаҳои равияи салафӣ ва шиаи исноашарӣ изҳори нигаронӣ мекунад. Қаблан ӯ гуфта буд, ба шунидаш намояндаҳои салафиҳову шиаҳои исноъашарӣ ба мансабҳои давлатӣ даст ёфтаанд: “мутаассифона, мешунавем, ки то ҳадду андозае баъзан аз ин гуруҳҳо, яъне намояндагони равияи салафӣ ва мазҳаби шиаи исноъашарӣ дар мақомҳои давлатӣ ҳам ҷой гирифтаанд, кор мекунанд ва барои густариш додани ақидаҳои худ талош доранд”.
Оқои Абдулқодирзода он вақт ҳушдор дод, куҷое пайравони ин ду гуруҳ бошад, он ҷо нооромӣ аст: “Ҳоло чанд нафаре дар инҷо ҳастанд, аз салафиҳо мебинед, ки дар саф халал меоранд. Дар намоз ҳаст, то охири намоз пояшро мебараду меорад. Халал мерасонанд, ба намозгузорон. То охири намоз фикру ҳушаш ба ҳамон ду пояш ҳаст, бечора... Чанборҳо шикоят кардаанд, "ҳазрати муфтӣ! Ҷавоне дар намоз пояшро мебараду болои поям мемонад, поямро мегирам, боз оварда мемонад. То охири намоз фикрамро парешон кард, ки намедонам, чӣ гуфтам. Масъалаи пойро дар намоз паҳн мондану наздик мондан, инро фуқаҳо ҳал кардаанд. Бар асоси мазҳаби Ҳанафия пой баробари китф бояд монда шавад. Муҳим саф рост бошад, ки ин афзал аст”.
Абдулқодирзода хост, ин афрод ба амалашон хотима бахшанд ва бо ёдоварӣ аз расман мамнӯъ шудани ҳаракати Салафия дар Тоҷикистон афзуд, “коре накунед, то ба мақомоти дахлдор ва ҳифзи ҳуқуқ арзу шикоятҳо кунанд, ки омада инҷо чандин нафарро ба маҳкама кашанд. Ӯ сабаби ба такрор дахл карданаш ба масоили шиаҳои “исноашарӣ” ва ҳаракатҳои мамнуулфаъолият ба мисли Салафияро шарҳ дода, гуфт, “бо ду чашми сарам дидаам, ки ингуна ихтилофоти динӣ чи гуна мардумро ба хуну обу оташ кашидаанд. Садҳо ҳазор нафар сарсону овора шуданд. Бас нест, якбор?! Боз ҳамин ҳаракатҳову низоъҳои динию мазҳабӣ?!”
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |