Имзои барномаи “Меҳнати арзанда барои солҳои 2015-2017” дар Душанбе
Сумангул Тағойзода, вазири меҳнат, муҳоҷират ва шуғли аҳолии Тоҷикистон зери барномаи ҳамкорӣ миёни шарикони сетарафаи Тоҷикистон ва Созмони байналмилалии Меҳнат “оид ба меҳнати арзанда барои солҳои 2015-2017” имзо гузоштааст.
Аз Вазорати меҳнат, муҳоҷират ва шуғли аҳолии Тоҷикистон хабар доданд, ки маросими баимзорасонии барнома рӯзи 24 июн сурат гирифтааст. Манбаъ мегӯяд, барномаи мазкур дар татбиқи стратегияи миллии рушди Тоҷикистон, стратегияи баланд бардоштни сатҳи некӯаҳволии мардуми кишвар ва дигар барномаҳои амалкунанда саҳми муносиб мегузорад: “Ин барнома ҳамчунин самтҳои афзалиятноки ҳамкорӣ бо Ташкилоти байналмилалии меҳнатро барои солҳои 2015-2017 ва масъалаҳои ҳамоҳангсозӣ, мониторинг ва баҳогузориро дар бар мегирад”.
Вазорати меҳнат мегӯяд, дар барнома се самти муҳими афзалиятноки ҳамкорӣ - баланд бардоштани иқтидори шарикони сетарафа дар танзими масъалаҳои афзалиятноки соҳаи меҳнат ҳангоми муколамаи иҷтимоӣ, рушди имкониятҳои шуғли арзандаи мардон ва занон, аз ҷумла муҳоҷирони меҳнатии баргашта ва беҳтар намудани шароити меҳнат ва фарохкунии ҳифзи иҷтимоӣ, муайян шудааст.
Ба иттилои манбаъ, бо татбиқи барнома имконияти дарёфти шуғли арзанда барои ҷавонон бо роҳи инкишофи малакаҳои касбӣ ва омӯзиши соҳибкорӣ зиёд мегардад: “Ҳамзамон низоми миллӣ дар соҳаи ҳифзи меҳнат такмил ёфта, назорати меҳнат пурзўр гардида, ба ҳифзи ҳуқуқҳои меҳнатии муҳоҷирон тақвият бахшида мешавад. Ташкилоти Байналмилалии Меҳнат ба паҳн намудани дониш оид ба масъалаҳои музди меҳнат бо истифодаи таҷрибаи байналмилалӣ ба ҷараёни ташаккули сиёсат дар соҳаи мазкур мусоидат менамояд”.
Барномаи мазкур аз ҷониби шарикони сетарафа дар Тоҷикистон дар ҳамдастӣ бо Гуруҳи дастгирии техникӣ оид ба масъалаҳои меҳнати арзанда ва бюрои Ташкилоти байналмилалии меҳнат барои мамлакатҳои Аврупои Шарқӣ ва Осиёи Марказӣ, бо дастгирии идораи минтақавии Ташкилоти байналмилалии меҳнат барои Аврупо ва Осиёи Марказӣ, департаментҳои техникии штаб-квартираи Ташкилоти байналмилалии Меҳнат дар Женева, инчунин Маркази илмии байналмилалӣ дар Турин татбиқ мегардад.
Дар маросими имзои барнома, ҳамроҳ бо Сумангул Тағойзода, Шерхон Салимзода, раиси Федератсияи иттифоқҳои касабаи мустақили Тоҷикистон, Азизбек Шарипов, раиси Иттиҳодияи корфармоёни Тоҷикистон, Хайнтс Коллер, директори минтақавии Бюрои минтақавии Ташкилоти байналмилалии меҳнат барои кишварҳои Аврупо ва Осиёи Марказӣ ва хонум Димитрина Димитрова, директори Гуруҳи дастгирии техникӣ оид ба масъалаҳои меҳнати арзанда ва бюрои Ташкилоти байналмилалии меҳнат барои мамлакатҳои Аврупои Шарқӣ ва Осиёи Марказӣ ширкат намудаанд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |