25 июн 2015 17:06Хабарҳои ҷаҳон

Чашмандозе ба ҳаводиси чанд рӯзи ахири Арманистон

Пулиси Арманистон гуфтааст, иғвоангезони ҳамоиши эътирозиро медонад, вале ба хотири шиддат нагирифтани авзоъ аз бурдани ном ва боздошти онҳо худдорӣ мекунад. Дар ҳамин ҳол, ҳамоишҳои эътирозӣ дар Ереван ва шаҳрҳои дигари ин кишвар шиддат мегиранд.

Генерали пулис -- Унон Погосиён гуфтааст, иғвоандозонро то замоне ки иғвои дигар наандозанд, боздошт намекунанд. Ин генерал гуфтааст, яке аз иғвоангезон хонуми укроиние миёни муътиризини хиёбони Баҳромиён аст. Теъдоди эътирозгаронро дар хиёбони мазкур расонаҳои русӣ бештар аз 6 ҳазор гуфтаанд, вале ВАО-и ғарбӣ мегӯянд, онҳо ҳудуди 10 ҳазор нафаранд.

Эътирозҳо алайҳи боло бурдани ҳаққи нерӯи барқ дар Ереван аз 19 июн ба ин сӯ идома дорад. Шабонарӯзи сеюм аст, муътаризон майдонро тарк намекунанд. Бо вуҷуди шиддат гирифтани эътирозҳо сарвазири Арманистон -- Овик Абрамён, имрӯз гуфтааст, ҳукумат тасмим надорад, қарори худро дар мавриди боло бурдани ҳаққи истифода нерӯи барқ бознигарӣ кунад. Ӯ ҳамчунин изҳор дошта, ҳукумат дар ин росто барои хонаводаҳои камбизоат имтиёзҳое пешбинӣ менамояд. Муътаризон изҳор доштаанд, то замоне ки талаби онҳо дар мавриди лағви қарори боло бурдани ҳаққи нерӯи барқ то 16 дарсад қонеъ нашавад, хиёбони Баҳромиёнро тарк намекунанд.

Ба иттилои бахши армании радиои “Озодӣ” имрӯз, 25 июн ба ҷамъи эътирозгарони Ереван эътирозгарон аз чаҳор шаҳри дигари ин кишвар -- Гюмри, Ванадзор, Аштарак ва Абовиён пайвастаанд. Баъзе аз фаъолони шабакаҳои иҷтимоӣ навиштаанд, теъдоди эътирозгарон 23 июн баъди талошҳои зӯрмандонаи пулис барои пароканда кардани муътаризон зиёд шудааст.

23 июн сафорати ИМА дар Арманистон дар изҳороти расмии худ аз истифодаи “нерӯи номутаносиб” дар баробари эътирозгарон нигаронӣ кард. Дмитрий Песков, сухангӯи Путин гуфтааст, Русия хостори оромӣ, пешрафт ва танзими ҳарчи зудтари нофаҳмиҳо миёни ҳукумат ва шаҳрвандони Арманистон мебошад.

Баъзе аз коршиносони рус гуфтаанд, агар Русия дар ҳаводиси Арманистон дахолат кунад, сарнавишти эътирозҳои Укроин инҷо такрор мешавад. Баъзе вакилони Думаи давлатии Русия ҳаводиси Арманистонро дахолати ошкорои Амрико барои аз дӯстӣ бо Русия халос кардани ин кишвар донистаанд.
Ҳарчанд, ки гуфта мешавад, дирӯз президенти Арманистон -- Серж Саргсян барои эътирозгарон имтиёз қоил шудааст ва дастур дода, қарори боло бурдани ҳаққи нерӯи барқ ба баррасӣ гирифта шавад, вале сарчашмаҳои расмӣ ин дастури президентро таъйид накардаанд.

Эътирозгарон аз рӯзи аввал талаб доранд, президент Серж Саргсян бо онҳо дидор намояд. Ҳарчанд сардори пулиси Арманистон ба эътирозгарон пешниҳод карда, 5-6 нафарро барои вохӯрӣ бо президент пешбарӣ намоянд, вале муътаризон ин пешниҳодро рад намудаанд.

Баъзе аз пойгоҳҳои интенетии русӣ навиштаанд, баъзе аз эътирозгарон дар майдон парчамҳои Укроин ва Иттиҳоди Аврупоро боло бардоштаанд. Ба иттилои расонаҳо, ҳоло эътироз дар фазои ором ҷараён дорад ва то кунун ҳеч кадом бархӯрди хашини пулис мушоҳида нашудааст. Вакилони маҷлис ва ҳунармандони ин кишвар девори зиндаеро дар майдони эътироз ба вуҷуд овардаанд, то бархӯрд миёни эътирозгарон ва пулис сар назанад.

Рӯзи чаҳоршанбе баъзе аз фаъолони ин кишвар аз тамоми шаҳрвандон хостанд, ба майдонҳо бирезанд, то ҳукумат маҷбур шавад, қарори боло бурдани ҳаққи нерӯи барқро лағв кунад. Онҳо ҳамарӯза аз 2 соат дар хонаҳояшон барқро хомӯш менамоянд ва дигар таҷҳизоти электрикро кор намебаранд, то бад-ин роҳ ба ширкати “Шабакаҳои барқи Арманистон" хисорот ворид шавад. Қаблан, “Шабакаҳои барқи Арманистон" аз Комиссияи давлатии танзими хадамоти ҷамъиятӣ талаб карда буд, ҳаққи истифода нерӯи барқ боло бардорад ва маҳз ҳамин қарор боиси эътирозоти густарда шуд.

Сардори пулиси Арманистон -- Владимир Ғаспарониён гуфтааст, агар хосияти оромонаи ҳамоиши эътирозӣ ҳифз шавад, онҳо “бо истифода аз зӯр эътирозро пароканда намекунанд”. Рӯзи сешанбе аз ҷониби пулис бо иттиҳоми даст доштан дар эътирозҳо 240 нафар, бо шумули рӯзноманигорон боздошт шудаанд. Гуфта мешавад, 20 тани дигар дар ин эътирозҳо осеб дидаанд.

Ҳарчанд ба навиштаи расонаҳо то кунун руҳияи зидирусиягӣ дар майдони Баҳромиён эҳсос нашудааст, вале баъзе аз расонаҳои русӣ эътирози Ереванро кори Вазорати хориҷаи Амрико донистаанд. Пойгоҳи хабарии “Газета. ру” навиштааст, “ҳоло эътироз руҳияи зидирусиягӣ надорад, вале агар Маскав дар ҳаводиси сарзада фитнаи Вазорати хориҷаи ИМА-ро ҷустуҷӯ кунад ва бори дигар технологияҳои “инқилобҳои рангаро” фош намояд, метавонад вазъият тағйир хӯрад”.

Вале гуфта мешавад, Русия наметавонад дар қазияи Арманистон дахил нашавад, зеро Арманистон яке аз аъзои Иттиҳоди иқтисодии АвруОсиёст, ки онро як лоиҳаи сиёсии Русия медонанд. Аз ҷониби дигар агар Русия ба таври анъанавӣ ҷонибдории худро аз ҳукумати феълӣ изҳор намояд, метавонад миёни эътирозгарон ва ҳамин тавр дар ин кишвар обрӯ ва ҳайсияти худро аз даст бидиҳад.

Баъзе аз коршиносони ғарбӣ гуфтаанд, сабаи аслии эътироз на боло рафтани ҳаққи истифодаи нерӯи барқ, балки фаъолият ва сиёсати ношаффофи ҳукумат дар баробари шаҳрвандон мебошад. Онҳо гуфтаанд, боло бурдани ҳаққи истифода нерӯи барқ як баҳона барои садо баланд кардани ҷомеаи шаҳрвандӣ мебошад, ки аз ҷониби ҳукумати Арманистон батамом рад карда мешуд.