11 июл 2015 10:19Тоҷикистон / Иҷтимоӣ

Ҳабси донишҷӯи тоҷик баъд аз тамрин дар Пешовару бозгашт ба Ватан

Додгоҳи ноҳияи Исмоили Сомонии шаҳри Душанбе як донишҷӯи тоҷикро, ки соли 2009 бо дастури ҳукумати Тоҷикистон таҳсили диниро дар хориҷ қатъ ва ба Ватан баргашта буд, чаҳор сол аз озодӣ маҳрум кардааст.

Дафтари матбуоти ин додгоҳ гуфтааст, ҳукми 4 соли зиндон алайҳи С.Қ ба хотири шомил шуданаш ба созмонҳои террористии “Ҳизби Исломии Афғонистон” ва гирифтани таълимоти низомӣ дар размоишгоҳи “Шабакаи Ҳақонӣ” дар шаҳри Пешовари Покистон хонда шудааст.

Ба иттилои манбаъ, С.Қ. моҳи декабри соли 2008 ба сафи “Шабакаи Ҳақонӣ”-и Пешовар шомил шуда, муддати 20 рӯз дар пойгоҳи низомии ин ташкилот таълимоти низомӣ гирифтааст: “Ӯ дар пойгоҳи ташкилоти террористии “Шабакаи Ҳақонӣ” машқҳои ҷисмониву низомиро гузашта, тарзи истифодабарии силоҳҳои оташфишони тапончаи тамғаи “ПМ” ва автомати “Калашников”-ро аз худ намудааст”.

С.Қ. 29 сол дошта, баъд аз гирифтани маълумоти миёна дар мактаби миёнаи №33-и ноҳияи Вахш моҳи январи соли 2007 барои идомаи таҳсил ва гирифтани таълимоти динӣ озими Эрон шуда, баъдан ба шаҳри Пешовар рафтааст. Моҳи октябри соли 2009 баъд аз тамрини низомии 20-рӯза дар Пешовар дубора ба Эрон баргашта, пас аз 1 моҳу 15 рӯз бо супориши ҳукумати Тоҷикистон ба Ватан омадааст: “Ҳангоми омадан ба Ватан ӯро кормандони ҳифзи ҳуқуқ мавриди бозпурсӣ қарор додаанд, аммо дар бораи ба пойгоҳҳои низомии ташкилотҳои террористии Пешовар рафтанаш чизе нагуфтааст”.

Дафтари матбуоти Додгоҳи ноҳияи Исмоили Сомонӣ афзудааст, ин донишҷӯи тоҷик баъд аз баргашт ва се моҳи иқомат дар Ватан ба хотири пайдо кардани ҷойи кор озими Русия шуда, баъд аз 5 соли муҳоҷирати меҳнатӣ дар қаламрави ин кишвар тасмим гирифтааст, моҳи июни соли 2015 барои барпо кардани оила ба Ватан баргардад. Санаи 14 марти 2015 кормандони пулис ӯро барои будубоши бидуни қайд боздошт ва ихроҷ кардаанд. Ҳангоми омадан ба Ватану мавриди бозпурсӣ қарор гирифтан иқрор кардааст, дар ташкилотҳои террористӣ дар ҳудуди Покистон иштирок кардааст, аммо ин амал дар пайи нофаҳмиҳо буда, аз кирдори содиркардааш сидқан пушаймон шудааст.

Аз ин рӯ, додгоҳ ӯро тибқи моддаи 187 қисми 2-и Кодекси ҷиноии Тоҷикистон айбдор эълон карда, бо дастрасии моддаи 15 қисми 1 Кодекси ҷиноӣ ҷазо дар намуди маҳрум сохтан аз озодӣ ба мӯҳлати 4 (чор) сол ва адо намудани он дар зиндони низомаш пӯрзур равонаи маҳбас кардааст: “Дар асоси моддаи 13 Қонун “дар бораи авф” мӯҳлати ҷазо ду сол кам карда шуд”.

Мӯҳр

Хабарҳои монанд:

али

Боз афсонаи аэ Сурия баргардед авф хохед шудро давом дихед .халки "быдло"бовар хоханд кард

Ҷавоб диҳед Иқтибос Шикоят

Буд набуд будгор буд

Мардумро ба кор таъмин кунед, имконияи хуби тахсил фарохам оред, ришваюситоию хешутабор бозиро бас кунед, бовар кунед ягон кас ба ончо намеравад, бисёрихо дар Азоби Россия токат накарда пайванди ифротгаро мешавад, Бовар кунед!!! Бас нест халки бечораро фиреб додан ?

Ҷавоб диҳед Иқтибос Шикоят

Эзоҳ илова кунед