27 июл 2015 15:39Тоҷикистон / Сиёсат

Наимӣ дар бораи кори Р.Эмомалӣ ва қаллобии “хешон”-и Президент (ВИДЕО)

Наимӣ Аламхони Қодирён, муовини якуми директори Оҷонсии назорати давлатии молиявӣ ва мубориза бо коррупсияи Тоҷикистон, имрӯз, 27-уми июл зимни нишасти матбуотӣ гуфт, талаботи раҳбари нави ин ниҳод-Рустами Эмомалӣ хеле сахт аст.

Қодириён изҳор дошт, ки бурду бохти кори Рустами Эмомалӣ дар варақаи матбуотии ин ниҳод баён карда шудааст: “Талаботҳо бениҳоят хеле сахтанд. Дар доираи ваколоатҳоямон кор карда истодаем. Баҳоро ба кори роҳбари агентӣ мо дода наметавонем. Баҳоро ба кори роҳбари Агентӣ мардум, президент ва ҳукумати Тоҷикистон медиҳад”.

Дар мавриди қаллобиҳо аз номи мансабдорон ва наздикони онҳо Аламхони Қодириён изҳор дошт, ки ин раванд майли афзоиш дорад. Ба гуфтаи масъулини ин ниҳод, дар маҷмуъ 377 ҳолати қаллобӣ ба қайд гирифта шудаанд ва шахсан аз номи наздикони президент як ҳолати қаллобӣ ба қайд гирифта шудааст. Аз рӯи ин ҳолат тафтишот идома дорад”.

ВИДЕОИ СУҲБАТИ ҚОДИРИЁН

Қаблан “Озодагон” иттилооъ дод, ки Хушдил Қурбонов, хонандаи синфи 10-и Мактаби байналмилалии Душанбе, ки худро Сомони Эмомалӣ, писари раисиҷумҳури Тоҷикистон муаррифӣ карда, ба масъулин дастурҳои ғайриқонунӣ медодааст, аз оилаи маъруфи Қурбоновҳо буда, воқеан ҳам шарикдарси Сомони Эмомалӣ будааст.

Ба иттилои манобеи “Озодагон” Хушдил Қурбонов, ҷияни Анвар Қурбонов, раиси Корхонаи нассоҷии тоҷик ё “Текстил” мебошад, ки яке аз соҳибкорони саршиноси кишвар аст. Манбаъ афзуд, бо назардошти он ки Хушдил Қурбонови ноболиғ гуноҳашро пурра иқрор кардааст ва ҳодисаи гирифтани маблағ моҳи август – сентябри соли гузашта, сурат гирифтааст, дар назар аст, нисбаташ қонуни афв татбиқ гардад.

Тибқи иттилои ин ниҳод, Хушдил Қурбонов, хонандаи синфи 10-и Мактаби байналмилалӣ бо хешовандаш -- Ҷӯрахон Холов бо мақсади қаллобӣ ва ба даст овардани фоидаи муфт, ба боварии шаҳрванд Маҳмадризо Раҷабов даромада, барои ҷудо намудани 30 ҳисса замини наздиҳавлигӣ дар ҷамоати деҳоти Чимтеппаи Рӯдакӣ аз ӯ 50 ҳазор доллари амрикоӣ гирифтаанд: “Баъдан онҳо ба Раҷабов Маҳмадризо гуфтаанд, ки барои гирифтани замин ба масъул Маҷидов Сабзалӣ муроҷиат кунад ва афзуданд, ки онҳо ба Маҷидов Сабзалӣ барои ҷудо намудани замин тариқи телефон дастур хоҳанд дод”.

Оҷонсии мубориза бо фасод афзуд, Қурбонов ба Сабзалӣ Маҷидов занг зада, худро Сомони Эмомалӣ муаррифӣ карда, гуфтааст, Раҷабов Маҳмадризо “одами ӯст” ва ба вай замин ҷудо кунад: “Ӯ чанд бор худро Сомони Эмомалӣ гуфта, ба Маҷидов занг зада, барои ҷудо намудани замин дастур додааст, аммо Маҷидов бовар накардаасту замин ҳам ҷудо накардааст”.

Ин дар ҳолест, ки ба иттилои манбаъ, ӯ ҳанӯз моҳҳои август ва сентябри соли 2014 аз Раҷабов 50 ҳазор доллари амрикоиро дар шаҳри Душанбе гирифтааст.

Мӯҳр

Хабарҳои монанд: