29 июл 2015 08:10Тоҷикистон / Акс / Тема дня

(АКС) Э.Раҳмон дар Дарвоз: Аз ифтитоҳи филиали бонк то ошхонаву Кохи бонувон ва “Меҳри модар”

Сафари кории Эмомалӣ Раҳмон, райисиҷумҳури Тоҷикистон аз Дарвоз аз деҳаи Қалъаи хумб бо ифтитоҳи бинои чорошёнаи хонаҳои истиқоматӣ ва филиали “Тоҷиксодиротбонк” оғоз шуд ва пасон оқои Раҳмон дар маркази ноҳияи Дарвоз бо гузоштани санги асос ба корҳои сохтмонӣ дар бинои шӯъбаи маорифи ноҳия оғоз бахшид.

Дафтари матбуоти президент мегӯяд, ин бино аз 3 ошёна иборат буда, арзиши лоиҳавии он 2 миллиону 481 ҳазор сомониро ташкил медиҳад ва бояд соли 2017 ба истифода дода шавад: “Баъди оғози корҳои сохтмонӣ дар бинои шуъбаи маорифи ноҳияи Дарвоз Президенти Ҷумҳурии Тоҷикистон Эмомалӣ Раҳмон ба деҳаи Даштаки ин ноҳия ташриф оварда, аз корхонаи коркарди санги “Карона - мармар” боздид ба амал овард. Корхонаи саноатии Карона - мармар аз ҷониби соҳибкорони ватанӣ бо ҷалби сармояи хориҷӣ аз Италия ва Ҷумҳурии Мардумии Чин дар деҳаи Даштаки ноҳияи Дарвоз сохта шудааст. Дар корхона зиёда аз 30 мутахассиси маҳаллӣ бо ҷойи кори доимӣ таъмин гардид”.

Эмомалӣ Раҳмон дар ҳудуди корхонаи Карона мармар дар ифтитоҳи коргоҳи замонавии Карона - Гавҳарнигор иштирок намуд, ки инҷо аз 75 намуд сангҳои гуногуни қимматбаҳо маҳсулоти ҳархелаи ороишӣ тайёр мешудааст: “Сарвари давлат Эмомалӣ Раҳмон ба деҳаи Умараки ин ноҳия омада, дар вазъияти тантанавӣ бинои Маркази омӯзиши ҳунарҳои кохи бонувон бо номи Меҳри модарро, ки барои 500 нафар пешбинӣ шудааст, ифтитоҳ намуд”.

Манбаъ мегӯяд, дар Кохи бонувон имкон аст, ки аз кишвари дӯсту ҳамсояи Ҷумҳурии Исломии Афғонистон духтарон барои омӯзиш қабул карда шаванд. Тавре маълум гардид аллакай 1000 нафар духтарон аз давлати ҳамсояи Афғонистон барои омӯзиши касб дар ин кохи бузурги бонувон номнавис шудаанд.
Тамоми таҷҳизоти дӯзандагии Кохи бонувон аз Олмону Япония тариқи лизинг ворид гардида, беҳтарин дастгоҳ барои истеҳсоли маҳсулоти хушсифат дар ҷаҳон мебошад: “Дар ҳамин ҷо Президенти мамлакат Эмомалӣ Раҳмон ба 5 ҷуфти хуштолеъи навхонадорон шаҳодатномаи ақди никоҳро супорида, ба онҳо хушбахтӣ ва хонаи обод таманно кард”.

Дар ноҳияи Дарвоз Эмомалӣ Раҳмон инчунин ошхонаи навбунёди қисми ҳарбии рақами 2711-и Сарраёсати қушунҳои сарҳадии Кумитаи давлатии амнияти миллӣ, ии Тоҷикистонро ифтитоҳ намуда, бо иштироки ӯ бинои комиссариати ҳарбии ноҳияи Дарвоз ифтитоҳ ёфт: “Дар маркази ноҳияи Дарвоз деҳаи Қалъаи хумб Президенти Ҷумҳурии Тоҷикистон Эмомалӣ Раҳмон бо буридани лентаи рамзӣ меҳмонхонаи шашошёнаи замонавиро ифтитоҳ кард”.