Амрико: 78 тоҷикистонӣ истисмори шаҳвонию меҳнатӣ шудаанд
Департаменти давлатии Амрико бо нашри гузориши ҷаддид дар мавриди қочоқи инсон изҳор доштааст, ки истисмори мардон, занон ва кӯдакони тоҷикистонӣ дар дохилу хориҷи кишвар ҳанӯз ҳам ҷой дорад.
Ин ниҳод бо нашри гузориш барои соли 2015 изҳор доштааст, ки “муҳоҷирати густурдаи меҳнатии мардон ва ҷудошавии ғайрирасмияшон аз ҳамсар, занону кӯдаконро осебпазир кардааст. Мардону занони тоҷик дар сохтмон ва хоҷагии қишлоқи Русия, Аморати Араб ва ба ҳадди камтар дар кишварҳои ҳамсояи Осиёи Марказӣ мавриди истисмори меҳнатӣ қарор гирифтаанд. Занон ва кӯдакони тоҷик умдатан дар Аморати Араб, Русия ва инчунин Арабистон Саудӣ, Қазоқистон, Афғонистон ва худи Тоҷикистон ба истисмори шаҳвонӣ дучор мешаванд”.
Вазорати умури хориҷӣ афзудааст, гузоришҳо нишон медиҳанд, ки занон ва духтарони тоҷик барои издивоҷи иҷборӣ ба Афғонистон интиқол ёфтаанд, ки ин мунҷар ба бардагӣ мешавад.
Манбаъ инчунин аз меҳнати кӯдакони тоҷик дар хоҷагии қишлоқ зикр карда, илова намудааст, ки тибқи гузориши ҳукумат соли гузашта се хоҷагии фермерӣ барои истифодаи меҳнати кӯдакон дар майдони пахта ҷаримабандӣ шудаанд. Тибқи ин гузориш соли 2014 мақомоти тоҷик 26 ҳолати қочоқи инсонро ошкор кардаанд. Ин нишондод соли 2013 ба 17 адад баробар будааст.
Аммо созмонҳои ҳифзи ҳуқуқ мегӯянд, соли 2014 ба 78 қурбонии қочоқи инсон дар Тоҷикистон кумакҳои ҳифозатӣ кардаанд, ки аз ин 53 нафарашон мавриди истисмори меҳнатӣ, 23 нафар мавриди истисмори шаҳвонӣ ва 2 нафар ҳам истисмори меҳнатию ҳам шаҳвонӣ шудаанд.
Вазорати умури хориҷии Амрико ба мақомоти тоҷик тавсия додааст, ки тариқи корҳои профилактикӣ, фаҳмондадиҳӣ ва такмили қонунгузорӣ мубориза алайҳи қочоқи инсонро пурзӯр кунанд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |