Шаби 29-уми июл дар пайи муноқиша миёни ҷавонон дар ноҳияи Рӯшон як ҷавони 20-сола аз пешонияш тир хӯрдааст.
Тавре манобеи “Озодагон” иттилоъ доданд, муноқиша миёни ҷавонони деҳаи Баррӯшон ва Вомар-маркази ноҳия сар задааст, ки дар натиҷа Бадавлат Хушбахтзода, донишҷӯ аз деҳаи Вомар аз тири таппонча ба ҳалокат расидааст: “Ӯ аз пешонияш тир хурда, дар ҷои ҳодиса ба ҳалокат расид. Пеш аз зуҳри имрӯз, 30-юми июл ҷанозаи марҳум ба хок супорида шуд”.
Манобеи “Озодагон” мегӯянд, муноқиша миёни ҷавонони ду деҳа аз он оғоз шудааст, ки чанд рӯзи қабл сокинони деҳаи Баррӯшон роҳи корвони мошинҳои тӯёнаи домоду арӯс аз деҳаи Вомарро баста, 600 сомонӣ ҳаққашонро талаб кардаанд ва ин боиси таниш миёни ҷавонон шудааст. Дар пайи ин қазия ҷавонони Вомар рӯзи гузашта, як ронанда аз деҳаи Баррӯшонро бо як духтари ҳаммаҳали худ дида, латукӯб кардаанд. Ҷавони латукӯбшуда бо таппонча баргашта дар маркази Вомар ба пешонии Бадавлат тир холӣ кардааст.
Дар ҳамин ҳол гуфта мешавад, номи нафаре, ки тир холӣ кардааст, маълум аст, аммо дар бораи боздошташ то ҳол иттилое дода намешавад.
Дар сурати дастрас шудани шарҳи расмии ин хабар “Озодагон” онро ироаи хонандагон хоҳад кард. Акси Бадавлат Хушбахтзода аз шабакаи иҷтимоӣ гирифта шудааст
Мӯҳр