10 авг 2015 11:14Тоҷикистон / Иҷтимоӣ

Баъди 2 соли супориши Президент: Боздошти муттаҳамон дар қатли 2 хонаводаи соҳибкор

Мақомоти умури дохилии вилояти Суғд аз боздошти муттаҳамон дар қатли аҳли оилаи соҳибкори тиллофурӯш аз ноҳияи Бобоҷон Ғафуров-Аҳмадхӯҷа Бобоев ва саррофон аз шаҳри Хуҷанд- Бурҳоновҳо иттилоъ доданд.

Манбаи “Озодагон” дар раёсати умури дохилии вилояти Суғд иттилоъ дод, ки боздоштшудагон дар ду ҷинояти махсусан вазнин-қатли Аҳмадхӯҷа Бобоев бо ҳамсару се кӯдакашон ва инчунин қатли падару писари сарроф-Юлдош ва Фарҳод Бурҳоновҳо айбдор мешаванд: “Саррофон-Юлдош ва Фарҳод Бурҳоновҳо, ки яке 52 ва дигарӣ 29 сол дошт, охири декабри соли 2011 бо истифода аз силоҳи Калашников дар Хуҷанд ба қатл расонда шуданд”.

Куштори Бобоевҳо баъди қариб 1,5 соли қатли Бурҳоновҳо 2-юми июни соли 2013 сурат гирифт, ки сарусадои зиёдро ба бор овард ва ҳатто Эмомалӣ Раҳмон, раисиҷумҳури Тоҷикистон, 20-уми июни соли 2013, зимни машварати корӣ бо роҳбарону фаъолони вилояти Суғд дар қасри Арбоби шаҳри Хуҷанд ба мақомоти қудратии вилоят дастур дод, ки қотилони хонаводаи соҳибкор, Аҳмадхӯҷа Бобоевро пайдо кунанд.

Вазорати умури дохилии Тоҷикистон дар ин робита эълон карда буд, соҳибкорони Суғд барои нафароне, ки барои ошкор кардани қатли 5 узви хонаводаи ин соҳибкор дар ноҳияи Бобоҷон Ғафуров мусоидат мекунанд, 30 ҳазор доллар подош хоҳанд дод.

Вазорати умури дохилӣ дар робита ба қатли хонаводаи Бобоев иттилоъ дода буд, ки соати чори субҳи дувуми июни соли 2013 “шахсони номаълум бо яроқи оташфишон мусаллаҳ гашта, бо мақсади роҳзанӣ” ба манзили Аҳмадхӯҷа Бобоев (соли таваллудаш 1973), сокини шаҳраки Ғафурови ноҳияи Бобоҷон Ғафуров, даромада, ӯ, ҳамсараш ва се фарзанди кӯчакашонро ба қатл расондаанд.

Ба қавли манбаъ, оқои Бобоев ва ҳамсари 39-солааш -- Ҳаётхон Бобоева соҳибкор будаанд. Вазорати умури дохилӣ мегӯяд, афроди ношинос фарзандони ин хонавода -- Рухшона Бобоева, хонандаи синфи 9, Суҳробҷон Бобоев, хонандаи синфи 8-ро бо истифода аз яроқи оташфишони тамғаи АКМ-5,45-мм ба қатл расонда, Санҷарбеки шашсоларо ба ҳаммомхонаи ҳавлии истиқоматиаш маҳкам намудаанд, ки аз дуди оташ заҳролуд гаштаву ба ҳалокат расидааст.”

Ба иттилои манбаъ, ин афрод “дари сандуқи оҳании дар хонаи истиқоматӣ ҷойгиршударо шикаста, тахминан ба маблағи 30 000 доллари амрикоӣ ҷавоҳироти тиллоиро тасарруф намуда, бо мақсади рӯйпӯш намудани ҷинояташон бо истифодаи бензин хонаи истиқоматии Аҳмадхӯҷа Бобоевро оташ зада, аз ҷойи ҳодиса ғайб задаанд".

Ин дар ҳолест, ки тибқи иттилои ғайрирасмӣ муттаҳамон дар ин ду ҷиноят низ узви як хонавода мебошанд, ки феълан дар боздошт қарор доранд ва тафтиши қазия идома дорад.

Мӯҳр

Хабарҳои монанд: