Дар пасманзари боздошти аъзои фаъоли ҲНИТ ва иттиҳомоти ахире, ки аз ҷониби Прокуратураи генералӣ нисбати ин ҳизб эълон гардид, “Озодагон” ба коршиносон чунин савол дод: МУНОСИБАТИ МАҚОМОТ БО ҲНИТ НАҚЗИ СОЗИШНОМАИ СУЛҲ НЕСТ?
Усмон СОЛЕҲ, сухангӯи Ҳизби халқӣ-демократии Тоҷикистон
Не, нақзи созишномаи сулҳ дида намешавад. Иттиҳомоте, ки ахиран дар робита ба ҲНИТ эълон гардидааст, ин қазияе аст, ки Прокуратураи генералӣ далелҳоро асоснок карда, гап задааст, яъне дар ҳодисаҳои ахири кишвар ҲНИТ даст дорад, бино бар ин, ман фикр мекунам дар муносибати мақомот бо ин ҳизб, ҳеч гуна нақзи Созишномаи умумии истиқрори сулҳ ва ризоияти миллӣ нест. Созишнома иҷро шуд ва имрӯз тамоми мардум барои ҳимояву таҳкими сулҳу субот талош меварзанд.
Абдулло ДАВЛАТОВ, раиси Иттиҳоди тоҷикони Русия
Комилан нақзи созишномаи сулҳ аст. Бадтар он аст ки ин як тасмими оҷилан гирифташуда нест, балки нақшаи таҳияшуда мебошад. Афсӯс, ки ин тасмим на фақат ба нобудии ҲНИТ ё қисме аз мардуми Тоҷикистон мекашад, балки худи Ватанро ба сӯи варта тела медиҳад. Ҳеч ба ақли солим рост намеояд, ки чаро чунин мекунанд?! Метарсам, ки ҳоло на мардум ва на ҳукумат хавфи дар пешбударо ба пуррагӣ дарк накардаанд. Дигар касе наметавонад гӯяд, ки ин амалҳои душмантарошӣ аз берун таҳия шудаву ба сари мардуми Тоҷикистон таҳмил шудаанд. Ин рафтори ҳамон тасмимгиронест, ки мисли кӯдакон қасдан коре мекунанд.
Ойниҳол БОБОНАЗАРОВА, раиси созмони ҷамъиятии “Перспектива+”
Дар муносибати мақомоти қудратӣ бо ҲНИТ нақзи созишномаи сулҳ дида мешавад. Вақте гап дар бораи сулҳ меравад, бояд ҳатман чизе, ки имзо шуд, нигоҳ дошта мешуд, чун ки сулҳ ҳеч вақт барои як муддат намешавад ва ҳамаи онҳое, ки дар имзои созишномаи сулҳ буданд, ширкат доштанд, нисбаташон эҳтиром гузоштан даркор. Мо медонем, ҳамин нафароне, ки ҳоло дар маҳбасанд, инҳо низ дар ҳамон гуруҳҳое буданд, ки сулҳ карда шуд.
Бобоҷон ҚАЮМОВ, коршинос
Агар ба ин қазия мунсифона назар кунем, мебинем, ки на танҳо ин боздоштҳо, балки муносибати ҳукумат бо ҲНИТ дар чанд соли охир нақзи созишномаи сулҳ будааст. Аз ҷумла далели ошкори ин гуфта вуҷуди худи протоколи 32-20 мебошад, ки тамоми бандҳои он алайҳи фаъолияти ҲНИТ равона шуда буд. Сипас дар солҳои ахир латту кӯби муовини раиси ҲНИТ ва сардабири нашрияи “Наҷот” низ далели дигари нақз кардани созишномаи сулҳ аз як тараф аст. Ин муносибат то он ҷо пеш рафт, ки мақомот ҳатто таҳаммули "сиёсати сабр”-и ҲНИТ -ро ҳам надоштанд. Онҳо фишору таҳдидро то он ҳад пеш бурданд, ки дафтарҳои ҳизбро дар минтақаҳо бастанд. Ба раиси ҲНИТ бо тухму помидор ҳамла намуданд. Аъзои ҲНИТ -ро маҷбур карданд, ки аз ҳизб хориҷ шаванд. Аммо ҲНИТ дар баробари ҳамаи инҳо сабр кард. Зеро медонист, ки рақибон мехоҳанд наҳзатро водор кунанд, ки даст ба амали хушунатомез бизанад. Аммо тамоми ин амалҳо натиҷа надод. Бинобар ин дар як иқдоми тарҳрезишуда масъулони ҲНИТ-ро боздошт намуданд ва онҳоро ҳамдасти собиқ муовини вазири дифоъ унвон карданд. Дар ҳоле, ки тамоми мардуми кишвар ва ҳатто коршиносони байналмилалӣ низ медонанд, ки наҳзат ба фикри амали хушунатомез набуд ва нест. Ҳоло ҳукумат мехоҳад бо ин баҳонаҳои сохта ҲНИТ-ро ҳизби террористӣ намоиш диҳад.
Абдуҳалим ҒАФФОРОВ, раиси Ҳизби сотсиалистӣ
Ман ҳеч гуна нақзи созишномаи сулҳро намебинам ва дар тӯли 24 соле, ки мардуми шарафманди Тоҷикистон истиқлолият ва сулҳу ваҳдатеро, ки ба даст овардааст, ҳоло барои нигоҳ доштани он талош меварзанд. Амалҳои Ҳизби наҳзати исломии Тоҷикистон на боиси дастгирӣ, балки боиси маҳкум кардан аст. Хусусан баъди амалҳои генерал Назарзода, ман ҳамчун раиси Ҳизби сотсиалистӣ ҳаминро гуфтаниям, ки ҲНИТ ба мо дигар лозим нест.
Абдуманнон ШЕРАЛИЕВ, таҳлилгар
Созишномаи сулҳ аллакай нақз шудааст. Чизе дигар аз он созишнома боқӣ намондааст. Ин ки дар Тоҷикистон алъон ҷанг нест, ба ин маънӣ нест, ки сулҳ ҳаст. Албатта дигар ҷанги шаҳрвандие, ки ду даҳсола қабл ҷараён дошт, такрор нахоҳад шуд, аммо ин сулҳ ҳам, ки алъон танҳо шабаҳаш боқӣ мондааст, дигар сулҳ нест. Ҳукумат даъво дорад, ки ҲНИТ мехост ҷанги навро оғоз кунад. Аммо ҲНИТ на мехост ва на метавонист ҷанг кунад. ҲНИТ танҳо девори қавие зидди ҷанг буд, ки ҳукумат бо дасти худаш рахнаҳое дар ин девор эҷод кард.
Мирғиёс АҲРОРОВ, ҳуқуқшинос
Имрӯз пеш аз ҳама мо бояд муқаррароти созишномаи сулҳро риоя намоем ва он созмону давлатҳое, ки кафили сулҳи точикон буданд, бояд бетарафӣ зоҳир накарда, сари ин масъла ҷиддӣ назорат баранд, зеро ҳамаи мо тоҷикону тоҷикистониён аз ҷангу ошубҳо безорем. Бояд ваҳдати миллиро дуруст шиносему ба қадраш расида, Ватанро обод намоем. Бояд ҳизбҳои сиёсӣ бемамониат аз рӯи оинномаашон амал намоянд ва саҳнаи сиёсатро на фақат барои як ҳизби ҳоким, балки барои ҳама якхел муҳайё намоем. Ман шахсан аъзои ягон ҳизбе набудаму нестам ва ҳамчун ҳуқуқшинос метавонам гӯям, ки ин кашмакашиҳои беасос оқибати хуб надоранд.