07 ноя 2015 12:28Тоҷикистон / Дидгоҳи хос

Кумитаи авиатсионии ИДМ боингҳои 737-ро хатарнок хонд

Кумитаи байнидавлатии авиатсионӣ, ки 11 давлати ИДМ, аз ҷумла Тоҷикистонро дар бар мегирад, ҳавопаймоҳои навъи “Боинг 737”-ро хатарнок хондааст.

Ин ниҳод бо пахши як иттилоия таъкид намудааст, ки низоми идораи баландии парвоз дар ҳавопаймоҳои “Боинг-737” ба такмил ниёз дорад. Тибқи иттилоияи ин ниҳод, ки 6 ноябр дар сомонаи расмияш нашр шудааст, маъмурияти авиатсияи ИМА дар посух ба Кумитаи байнидавлатӣ кафолати амнияти парвозҳо дар ҳавопаймоҳои Боинг-737-ро надодааст. Ин ниҳод суқути Боинг 737 дар Қазонро, ки соли 2013 рух дод, маҳз ба номукаммалии техникии ин навъи боингҳо марбут донистааст.

Бо назардошти ин Кумитаи байнидавлатии авиатсионӣ сертификати истифодаи ҳавопаймоҳои Боинг-737-ро аввали моҳи ноябр бозхонд намудааст, аммо ахиран боз ин қарорашро лағв кард.

Коршиносон қарори Кумитаи байнидавлатии авиатсиониро “бозиҳои дохилӣ” арзёбӣ карда, боингҳои 737-ро аз бехатартарин намуди ҳавопаймоҳо арзёбӣ кардаанд. Росавиатсия низ эълон кард, ки истифодаи боингҳои 737-ро дар Русия манъ нахоҳад кард ва Кумитаи байнидавлатии авиатсионӣ низ қарорашро дар ин маврид лағв намудааст.

Ин иддао дар ҳолест, ки ширкатҳои тоҷикистонӣ, “Сомон Эйр”-у “Тоҷик Эйр” низ боингҳои навъи 737 доранд ва ҳатто Эмомалӣ Раҳмон, раисиҷумҳури Тоҷикистон низ аз ин навъи ҳавопаймо истифода мебарад.

Кумитаи байнидавлатии авиатсионӣ соли 1991 ташкил шуда, фаъолияташ ба таъмини амнияти парвозҳои гражданӣ дар қаламрави ИДМ равона шудааст. Феълан Тоҷикистон, Русия, Озарбойҷон, Туркманистон, Қазоқистон, Қирғизистон, Узбакистон, Украина, Белорусия, Арманистон ва Молдова узви ин Кумита мебошанд.

Мӯҳр

Хабарҳои монанд: