11 ноя 2015 12:00Тоҷикистон / Иқтисодӣ / Дидгоҳи хос / Тема дня

Таҳқиқоти “Reuters” насабу дороии духтарони Путинро ифшо кард

Хабаргузории “Reuters” 10 ноябр натиҷаи таҳқиқоташро дар бораи духтарони Владимир Путин, раисиҷумҳури Русия нашр карда, исбот намудааст, ки Катерина, духтари Путин насаби Тихоноваро дорад. Тибқи ин таҳқиқот Катерина Тихонова ноиби ректори Донишгоҳи давлатии Маскав ва раҳбари бунёди “Иннопроект”-и ин донишгоҳ мебошад.

“Reuters” мегӯяд, Путин тайи солҳои раҳбарияш дар Русия тавонистааст бар нафси ҷамъоварии пул пирӯз шавад ва ҳамчун одами миёнаҳол даромадашро дар соли 2014-7,65 миллион рубл нишон додааст. Ба иттилои манбаъ Путин соҳиби қитъаи замин, хонаи на он қадар калон ва гараж буда, як хонаю гаражи дигарро ба иҷора гирифтааст.

Аммо духтари Путин тибқи ин таҳқиқот ба шарофати шиносҳои падараш, соҳиби дороии зиёд мебошад.

Андрей Акимов, раҳбари “Газпромбанк” тасдиқ кардааст, ки Катерина, духтари Путин бо насаби Тихонова зиндагӣ мекунад. “Reuters” менависад, ин духтари 29-солаи Владимир Путин ҳамсари Кирил Шамалов, писари Николай Шамалов, яке аз дӯстони деринаи Путин мебошад.

Кирил Шамалов, шавҳари Катерина саҳмдори аршади бонки “Россия” маҳсуб мешавад, ки онро бонки элитаи Русия низ мегӯянд. Инчунин аз виллаи 3.7 миллион доллараи ин ҷуфт хабар дода шудааст, ки дар Биарритзи Фаронса ҷойгир аст. “Reuters” аз қавли таҳлилгарони молӣ дороиҳои Кирилл ва Катеринаро 2 миллиард доллар шумурдааст.

Огоҳони умури молии ин оила гуфтаанд, ки бахши аъзами дороияшонро саҳмияҳои ширкати нафтӣ ташкил медиҳанд, ки аз Геннадий Тимченко, яке дигар аз дӯстони Путин харидорӣ шудаанд.

Афзун бар ин Катерина Тихонова раҳбарии тарҳи “Иннопроект”-и Донишгоҳи давлатии Маскавро дар даст дорад. Тибқи навиштаи “Reuters” духтари Путин дар доираи ин тарҳ бо чандин созмон ба қиммати миллионҳо доллар қарордод имзо кардааст, аммо дар мавриди суди шахсии Катерина аз ин тарҳҳо ҳеч далеле рӯи даст нест. Инчунин гуфта шудааст, ки ӯ бо амалӣ кардани бозсозии Донишгоҳи давлатии Маскав машғул аст, ки дар он 1,7 миллиард доллар масраф хоҳад шуд.

Мария, духтари калонии Путин ҳамсари Йорит Йоост Фаасен, тоҷири голландӣ аст, ки хатмкардаи риштаи биологияи донишгоҳи Петербург ва риштаи тибби донишгоҳи Маскав мебошад. Мария номзади илмҳои биологӣ мебошад ва инчунин ба тарҳи “Алфа-Эндо”, кумак ба гирифторони бемории “эндокринная система” машғул аст. Ба навишати “Reuters” ин тарҳро бонки “Алфа-Банк” сармоягузорӣ мекунад, ки дар ИМА, Бритониё ва Кипр низ намояндагӣ дорад. Йоритт Йоост Фаассен, шавҳари Мария то моҳи августи соли гузашта ба ҳайси муовин раиси “Газпромбанк” будааст.

Мӯҳр

Хабарҳои монанд: