Нигаронии Э.Раҳмон аз ДИИШ дар Афғонистон: Бо зӯрӣ намешавад...
Эмомалӣ Раҳмон, раисиҷумҳури Тоҷикистон дар Исломобод аз пайдоиши ҳаракати террористии “Давлати исломӣ” дар Афғонистон изҳори нигаронӣ кардааст.
Дафтари матбуоти раисиҷумҳури Тоҷикистон мегӯяд, Эмомалӣ Раҳмон зимни суханронияш дар ҳузури Мамнун Ҳусайн, президенти Покистон дар Донишгоҳи ба номи Қойиди Аъзами Покистон ҳушдор додааст, ки дар қаламрави Афғонистон пайдо шудани гурӯҳҳои гуногуни террористӣ, аз қабили “Давлати исломӣ”, ба амнияти тамоми минтақа таҳдид менамояд: “Дар ин росто метавон гуфт, ки вазъият дар Афғонистони ҳамсоя ҳанӯз муташанниҷ аст. Ин ҳолат чолишҳои нав ба навро барои амнияти кишварҳои мо эҷод месозад”.
Раиси ҷумҳури Тоҷикистон таъкид намудааст, ки бо истифодаи зӯри низомӣ мушкилот дар Афғонистон бартараф нахоҳанд шуд ва далел овардааст, “таърихи ду даҳсолаи ахири Афғонистон собит кард, ки терроризм ва ифротгароиро наметавон танҳо бо роҳи низомӣ решакан кард”.
Эмомалӣ Раҳмон зарур хондааст, ки ба Афғонистон дар эҳёи иқтисодиёт, кишоварзӣ, истифодаи имконоти транзитӣ, аз тариқи татбиқи пружаҳои зербиноӣ ва кумаки молию техникӣ ба пешбурди ислоҳоти идорӣ аҳаммияти бештар дода шавад: “Аз сӯи дигар, татбиқи тарҳҳои коммуникатсионӣ – нақлиётӣ, бунёди хатҳои интиқоли барқ, лӯлаи газ ва дигар тарҳҳои минтақавӣ, аз ҷумла дар масири Тоҷикистон ва Покистон маҳз аз вазъи амниятии Афғонистон вобаста мебошад. Мо барои ҳарчи зудтар ба имзо расонидани Созишномаи сеҷонибаи тиҷорати транзитӣ байни Ҷумҳурии Тоҷикистон, Ҷумҳурии Исломии Покистон ва Ҷумҳурии Исломии Афғонистон манфиатдор мебошем. Санади номбурда метавонад такондиҳандаи ҷиддии робитаҳои судманди иқтисодиву тиҷоратӣ миёни се кишвар гардад”.
Ӯ афзудааст, ки Осиё хонаи умумии мост: “Ҳамаи мо хоҳони онем, ки дар ин хонаи умумиамон сулҳу субот ҳукмфармо бошад. Мушкилоте, ки дар ин минтақаи бузург ҳастанд, бо ҳам шабеҳ ва муштараканд. Бинобар ин василаҳои мубориза бо онҳо низ бояд муштарак бошанд. Имрӯз ҳамаи кишварҳо ҷиҳати мубориза бо хушунат ва ифротгароӣ ҳамкорӣ доранд”.
Раисиҷумҳури Тоҷикистон махсусан таъкид кардааст, ки дар муборизаҳои геосиёсӣ, имрӯз аз мухолифатҳои қавмиву мазҳабӣ сӯистифода мегардад: “Доираҳои алоҳида саъй доранд, то дар миёни пайравони дини мубини ислом тафриқа ва низоъ барангезанд. Мо бояд садди роҳи бадном сохтани дини мубини ислом аз ҷониби доираҳои ғараздори сиёсӣ бошем”.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |