06 янв 2016 16:57Тоҷикистон / Иқтисодӣ / Тема дня

Бег Зуҳур: Буҳрон даромади мизоҷон ва соҳаи алоқаро кам кард

Бег Зуҳур, сардори Хадамоти алоқаи Тоҷикистон дар ҷамъбасти соли 2015 хабар додааст, ки соли гузашта даромади умумии соҳа 2 миллиарду 667 миллион сомониро ташкил додааст, ки баробари 99,7%-и нишондоди соли 2014 мебошад.

Тибқи иттилоияи расмӣ дар ҷаласаи ҷамъбастӣ, ки 5 январ бо ҳузури Азим Иброҳим, муовини сарвазири Тоҷикистон баргузор шуд, Бег Зуҳур сабаби асосии коҳиш ёфтани ҳаҷми хизматрасониҳои соҳаи алоқаро ба буҳрони иқтисодӣ рабт додааст. Ба гуфтаи раиси Хадамоти алоқа бо тадриҷан коҳиш ёфтани даромади муштариён ҳаҷми истифодаи хизматрасониҳои алоқа низ рў ба коҳиш ниҳодааст: “Саҳми операторони хусусӣ дар бозори алоқаи Тоҷикистон дар соли 2015 2 миллиарду 540,6 миллион сомониро ташкил додааст, ки нисбати соли 2014 0,8 % кам мебошад”.

Аммо дар баробари ин Б.Зуҳур аз пешрафт дар корхонаҳои тобеяш гузориш додааст: “Аз ҷумла ҶСК «Тоҷиктелеком», КВД «Почтаи Тоҷик» ва КВД «Маркази мутобиқати электромагнитӣ» фаъолияти худро мутаносибан бо нишондиҳандаҳои 111,5%, 110,9 % ва 108,6% нисбат ба соли 2014 ҷамъбаст намуданд”.

Азим Иброҳим дар ҷаласаи ҷамъбастӣ Бег Зуҳурро муваззаф намудааст, ки ба иҷрои супориши ҳукумат дар бораи насби телефонҳои хонагӣ ва зиёд намудани истифодабарандагони он чораҳои иловагиро андешанд. Ноиби сарвазир инчунин хостори сари вақт дастрас намудани рўзномаю маҷаллаҳо ба ноҳияҳои дурдаст шудааст. Ӯ таъкид днамудааст, ки рўзнома ва маҷаллаҳои расмӣ дар баробари пур кардани фазои иттилоотии мамлакат, ҳамчунин инъикоскунандаи воқеии сиёсати давлатӣ низ мебошанд ва аз ин хотир мушкилот дар дастрас намудани онҳо бояд ҳарчӣ зудтар бартараф карда шаванд.

Азим Иброҳим инчунин барои фаро гирифтани водии Бартанги Бадахшон бо алоқаи мобилӣ дар соли 2014 ва оғози корҳои пайвасткунии дастгоҳҳои мобилӣ дар деҳаи Ғудараи ин водӣ дар охири соли соли 2015 ва аввали соли 2016 изҳори сипос намудааст.

Мӯҳр

Хабарҳои монанд: