14 янв 2016 09:43Оcиёи Марказӣ / Тоҷикистон

Ташхисгоҳи наву шарҳи вазир: Падариро муайян мекунему ба бакорат кордор намешавем (НАВШУДА)

Нусратулло Салимзода, вазири тандурустӣ ва ҳифзи иҷтимоии аҳолии Тоҷикистон имрӯз, 14 январ Маркази миллии ташхиси генетикиро фаъол кард.

Ба иттилои оқои Салимзода, ташхисгоҳи мазкур дар пайи супориши Эмомалӣ Раҳмон, раисиҷумҳури Тоҷикистон фаъол шуда, имкон медиҳад, бемориҳои ирсӣ ва маризиҳои кӯдакон ҳанӯз дар батни модар ташхис шаванд. Ӯ афзуд, ташхисгоҳи мазкур инчунин имконият медиҳад, ки дар Тоҷикистон санҷиши “ДНК” гузаронда шавад: “Метавонем падариро муайян кунем, ки то ҳол дар Тоҷикистон набуд”.

Фотима Ғоибова, сухангӯйи Вазорати тандурустӣ мегӯяд, марказ бо навтарин дастгоҳҳои замонавӣ муҷаҳҳаз шуда, мутахассисони он дар Ҷумҳурии исломии Эрон ва Ҷумҳурии Молдов давраи омӯзиширо гузаштанд: “Машваратдиҳии тиббию генетикии оилаҳо ва беморони мубталои иллатҳои ирсӣ ва модарзодӣ бо истифодаи таҳлили генеалогӣ, усули синдромологӣ, усулҳои ситогенетикии тадқиқот ҳангоми аниқ намудани ташхис ба роҳ монда мешавад”.

Ба иттилои ӯ, маркази мазкур зинаҳои ноҳиявӣ, шаҳрӣ, минтақавӣ(вилоятӣ, ҷумҳуриявӣ)–ро фаро гирифта, расонидани кумаки махсусгардондашудаи тиббиро ба ҷойи зисти доираи вобасташудаи аҳолӣ ҳаддалимкон наздик мекунад: “Ҳамчун қимси таркибии системаи муассисаҳои муолиҷавию профилактикии тандурустии амалӣ фаъолият намуда, чорабиниҳои худро дар ҳамоҳангсозӣ бо муассисаҳои акушерӣ, педиатрӣ ва дигар муассисаҳо ба роҳ мемонад”.

Нусратулло Салимзода, вазири тандурустӣ ва ҳифзи иҷтимоии аҳолии Тоҷикистон ба суоли “оё зимни ташхиси навхонадорон пеш аз никоҳ бокирагии ӯ низ санҷида мешавад?” посух дод, танҳо як қатор бемориҳоро муайян мекунаду ба бокирагии арӯсон кордор намешаванд: “Не, ин чиз нест, муоинаи ҳатмӣ пеш аз издивоҷ нисбати як қатор бемориҳо мебошад, аз ҷумла СПИД, бемории сил, бемории оташак ва дигар бемориҳои дигар аст. Мо ба бакорату дигараш кор надорем”.

Ба гуфтаи вазир муоинаи ҳатмии тиббии издивоҷкунандаҳо аз якуми июли соли 2016 мавриди амал қарор мегирад. Дар ҳамин ҳол Шералӣ Раҳматуллоев, сардори раёсати хизматрасонӣ ба модару кӯдак ва танзими оилаи Вазорати тандурустӣ иброз дошт, муоинаи ҳатмӣ маънои онро дорад, ки издивоҷкунандаҳо аз ташхиси тамоми намуди бемориҳо мегузаранд: “Яъне, ин афрод аз мутахассисони чашм, гӯш, шикастабандӣ ва ҷарроҳ мегузрананд. Бемориҳои СПИД, сил ва оташак ташхисашон ҳатмӣ мебошад, зеро дар оянда ин бемориҳо таъсири худро барои насл мерасонанд”.

Ба гуфтаи Раҳматуллоев, қоидаҳои гузаштани муоинаи тиббиро таҳия карда, барои тасдиқ ба ҳукумати кишвар пешниҳод мекунанд.

Вакилони Маҷлиси намояндагони Тоҷикистон лоиҳаи тағйру иловаҳо ба Кодекси оиларо, ки муоинаи тибии пеш аз издивоҷи ҷавононро пешбинӣ кардааст, қабул карданд. Шукурҷон Зуҳуров, раиси палатаи поёнии парлумон 13 январ зимни баррасии ин лоиҳа гуфт, амалишавии муоинаи тиббӣ қабл аз издивоҷ моҳи июли соли равон дар назар аст. Ӯ гуфт, бе ҳуҷҷати тасдиқкунандаи анҷоми муоинаи тиббӣ ақди никоҳи ҷавонон сабт нахоҳад шуд. Нусратулло Салимзода, вазири тандурустӣ ва ҳифзи иҷтимоии аҳолӣ ҳангоми муаррифии лоиҳа изҳор дошт, муоина ройгон буда, онҳо талош мекунанд, ҳангоми анҷоми он аз ҷониби мутахассисон саҳлангорӣ сурат нагирад.

Мӯҳр

Хабарҳои монанд:

Фахриддин

Мухтарам Вазир санчиши тибби ройгон гуфтед,то холо маълумотхо буд,ки пулаки,ба вaъдаатон истода инро ичро кунед,ана конун мешавад.

Ҷавоб диҳед Иқтибос Шикоят

Дехоти

Ин бисёр хуб аст падархои мухочир бечорахо аз фарзандони ногахони огох шаванд ва хилаву найранги занон ошкор шавад. Агар чунин шавад баъзе занон низ ба рамка медароянд.

Ҷавоб диҳед Иқтибос Шикоят

Навруз Носири

Дар ш.Кулоб хело шуд амал дорад пеш аз конун баромадан.Лекин хамаи муоина ПУЛАКИ мебошад.Инро бояд хама донад бе пул нест Вазири Мухтарам назорат баред!!!!!!!!!!!!

Ҷавоб диҳед Иқтибос Шикоят

Эзоҳ илова кунед