10 фев 2016 08:31Тоҷикистон / Иқтисодӣ

Шӯрои адлия сабаби фаъол набудани сомонаҳои судҳоро буҳрони молӣ хонд

Шӯрои адлияи Тоҷикистон далели фаъол набудани сомонаҳои интернетии чанде аз додгоҳҳои кишварро ба буҳрони молӣ ва саривақт маблағгузорӣ нашудани ҳаққи хизматрасонии онҳо гуфт.

Дӯстмурод Муродзода, раиси Шӯрои адлияи Тоҷикистон дар нишасти хабарии ахираш дар Душанбе дар посух ба суоли “Озодагон”, ки чаро сомонаҳои бархе додгоҳҳо фаъол нестанд, изҳор дошт, “яке аз сабабҳо муттассифона бо назардошти шароити буҳрони молӣ-иқтисодӣ сари вақт маблағгузорӣ карда нашудани ин сомонаҳо аз ҷониби судҳои ҷумҳурӣ мебошад. Чун ки норасоии маблағ дар соли 2015-ум мутаасифона дар самти таъминоти рушди воситаҳои иттилоотӣ-коммуникатисионии судҳо ба чашм мерасид”.

Ҷаноби Муродзода мегӯяд, баъди аз фаъолият боз мондани бархе сомонаҳои судҳои кишвар, маҷбур шудаанд ба провайдерҳои миллӣ ба тариқи шифоҳӣ муроҷиат намоянд: “Мо муроҷиат намуда, гуфтем, солҳои тулонӣ бо шумо ҳамкорӣ дорем, маблағи муайянеро ҳамасола пардохт мекунем, мо мизоҷи доимии шумо ҳастем ва ягон ҷо гурехта намеравем, маблағ дорем, ин ки ним моҳу як моҳ бо назардошти шароити муайяни низоми молиявии имрӯзаи хазинадорӣ маблағҳо дертар мегузаранд, маънии онро надорад, ки шумо фаъолияти сомонаҳоро қатъ намоед”.

Ӯ дар идома афзуд, дар пайи ин муроҷиат сомонаи Шӯрои адлияро боз карданд, вале сайти додгоҳҳо ҳанӯз фаъол нашуданд: “Корҳо дар ин самт идома доранд. Умуман дар ягон давлати дунё ин хел нест. Мо мизоҷ ҳастем, маблағро доимӣ пардохт карда истодаем, аммо онҳо бо гузашти як ҳафта зуд сомонаро мебанданд”.

Масъулини Шӯрои адлия таъкид намуданд, талош хоҳанд кард, то давоми моҳи ҷорӣ сомонаи тамоми додгоҳҳои кишвар фаъол гарданд.

Қатъи фаъолияти бештари сомонаи додгоҳҳо пардохт нашудани ҳаққи “домен” ва “хостинг” арзёбӣ мешавад. Бино ба иттилои vip.tj, як сомонаи марбут ба пешниҳоди ин хизматрасониҳо, арзиши солонаи "домен-tj" 15 ва "хостинг" аз 150 то 170 долларро ташкил медиҳад.

Дар акс намое аз торнамои Додгоҳи олии Тоҷикистон

Мӯҳр

Хабарҳои монанд: