12 фев 2016 09:29Тоҷикистон / Сиёсат

Сафир: Русия ба ваъдаи ёрии низомиву техникӣ ба Тоҷикистон вафо мекунад

Сафири Русия дар Тоҷикистон гуфтааст, ҷониби Русия омода аст тамоми тааҳҳудоти худ дар заминаи ҳамкориҳои низомию техникӣ бо Тоҷикистонро иҷро кунад.

Игорь Лякин-Фролов дар як мусоҳибаи ихтисосӣ бо хабаргузории “РИА Новости” таъкид кардааст, Русия ба Тоҷикистон дар таҷдиди қувваҳои мусаллаҳ дар ростои ҳамкориҳои дуҷониба ёрӣ намуда, ба Душанбе техникаи муосири аслиҳаӣ ва низомиро ворид кардааст. Ин изҳори назари сафири Русия дар Тоҷикистон дар ҳолест, ки чанд рӯз пештар Сироҷиддин Аслов, вазир умури хориҷаи Тоҷикистон дар суҳбат бо хабарнигорон гуфта буд, “дар масъалаҳои низомӣ ва ҳифзи сарҳад, мубориза алайҳи терроризм, сепаратизм бо Русия ҳамкории хуб дорем ва аксари кӯмакҳоро на дар сатҳи дуҷониба, ҳатто дар чаҳорчӯбаи Созмони аҳдномаи амнияти дастаҷамъӣ ва дигар созмонҳо мегирем”.

Сафири Русия дар Тоҷикистон дар мусоҳиба гуфтааст, чанде пештар муовини вазири дифои Русия -- Анатолий Антонов ба Душанбе омадаву изҳор дошт, Маскав омода аст тамоми тааҳҳудоти худ дар заминаи ҳамкориҳои низомию техникӣ бо Тоҷикистонро иҷро кунад. Игорь Лякин-Фролов афзудааст, Русия тавассути пойгоҳи 201 кафили истиқлол ва соҳибихтиёрии Тоҷикистон буда, дар таъмини вазъияти мутавозини низомию сиёсии ин кишвар саҳм мегузорад: “Русия дар ҳолатҳои таҳдиди хатар ба Тоҷикистон мардуми тоҷикро танҳо намегузорад”.

Дар ин мусоҳиба сафири Русия аз сатҳи ҳамкории сафорат бо Вазорати умури хориҷаи Тоҷикистон изҳори қаноатмандӣ карда, гуфтааст, қаробати мавқеъҳо дар самти муаммоҳои асосии байналмилалӣ шароити мусоидро барои ҳамкорӣ эҷод кардааст. Сафир ҳамчунин гуфтааст, Тоҷикистон ҳанӯз ба омӯзиши асноди меъёриву ҳуқуқии иттиҳоди иқтисодии Авруосиё машғул буда, кадом изҳори назари мушаххасе барои пайвастан ба ин созмон садо надодааст.

Мӯҳр

Хабарҳои монанд: