12 фев 2016 10:57Тоҷикистон / Иҷтимоӣ

Боздошти гурезаи афғон бо иттиҳоми гардиши ғайриқонунии 72 кило маводи мухаддир

Кумитаи давлатии амнияти миллии Тоҷикистон аз ошкор шудани гуруҳи муташаккили нашъаҷаллоби фаромиллӣ хабар додааст.

Бино ба иттилои ин ниҳод, дар ҳайати ин гуруҳ шаҳрвандони Тоҷикистону Афғонистон шомил будаанд. Манбаъ гуфтааст, дар натиҷаи тафтиши пешакӣ муайян гардида, шаҳрванди Афғонистон – “Ш.М.”, ки аз соли 1997 бо аҳли хонаводааш ҳамчун гуреза дар Тоҷикистон ба сар мебарад, бо шаҳрванди Тоҷикистон – “Ҷ.А.”, сокини муваққатии Душанбе барои аз Афғонистон ба Тоҷикистон интиқол додани маводи мухаддир созиш бастаанд: “Дар ин амали ҷиноятӣ ба онҳо қочоқбари афғон бо номи Шоиста кумак намудааст. Гуруҳи мазкур бо роҳи қочоқ 113 бастаи махсус — зиёда аз 70 кило маводи мухаддирро ғайриқонунӣ, бо истифода аз мавзеи сарҳадии Сайроб аз хориҷи кишвар ба ҳудуди Тоҷикистон гузаронид”.

Ба иттилои манбаъ, “Ҷ.А.” баъд аз гирифтани ин миқдор маводи мухаддир 23 бастаи онро ба воситаи мошини гурезаи афғон “Ш.М.” ва нафари ҳамроҳаш бо номи Ҷамшед ба шаҳри Душанбе интиқол доданд: “9 феврали соли равон кормандони КДАМ шаҳрванди Тоҷикистон “Ҷ.А.” ва шаҳрванди Афғонистон “Ш.М.”-ро дастгир карда, ҳангоми азназаргузаронии воситаи нақлиёт, аз дохили пинҳонгоҳи махсус 23 бастаи полиэтилениро ошкор ва мусодира карданд. Хулосаи ташхиси махсус муайян кард, ки дар бастаҳо 22 кило воситаҳои нашъадори ҳашиш ва чарс будааст”.

КДАМТ меафзояд, дар идомаи чорабиниҳои иловагии фаврӣ-ҷустуҷӯӣ, кормандони мақомоти амнияти миллӣ аз дохили як махфигоҳ, воқеъ дар деҳаи Сайроби ноҳияи Ҳамадонӣ боз 90 бастаи махсусро бо 50 килограмм маводи мухаддир дарёфту мусодира намуданд: “Вазни умумии воситаҳои нашъадори мусодирашудаи ҳашиш ва чарс, ки ба боздоштшудагон “Ш.М.” ва “Ҷ.А.” тааллуқ доштанд, дар маҷмуъ 72 килоро ташкил дод”.

Мӯҳр

Хабарҳои монанд: