23 фев 2016 17:12Тоҷикистон / Фарҳангу адаб / Видео

Додгоҳ Остон Азизовро 4 ҳазор сомонӣ ҷарима кардааст (ВИДЕО)

Додгоҳи ноҳияи Исмоили Сомонии шаҳри Душанбе Остон Азизов, овозхони шинохтаи кишварро чор ҳазор сомонӣ ҷарима кардааст.

Бино ба иттилои ин ниҳод, Азизов бар пояи моддаи 481-и Кодекси ҳуқуқвайронкунии маъмурӣ муҷрим шинохта шуда, ба андозаи 100 нишондиҳанда барои ҳисобҳо, баробар ба 4000 сомонӣ ҷарима баста шудааст.

Додгоҳи ноҳияи Исмоили Сомонӣ мегӯяд, Остон Азизов бидуни қарордод дар як тӯй ҳунарнамоӣ кардааст. Ба иттилои манбаъ, гуруҳи кории Раёсати танзими анъана ва ҷашну маросимҳо дар пайи як санҷиш муайян кардааст, ки Остон Азизов 16 августи соли 2015 дар иистироҳатгоҳи “Жасмин”, воқеъ дар ноҳияи Варзоб дар тўйи хонадоршавии бародари шаҳрванд Ҳакимов Б хизмат мерасонад: “Дар мурофиаи судӣ ҳуқуқвайронкунанда Остонақул Азизов худашро дар содир намудани ҳуқуқвайронкунии маъмурӣ гунаҳгор наҳисобида, нишон дод, ки 16 августи соли 2015 ҳангоми бозгашт аз ноҳияи Айнии вилояти Суғд ба ӯ як шиносаш бо номи Ҷамшед тавассути телефони мобилӣ занг зада, хоҳиш намудааст, ки ба тарабхонаи “Жасмин” даромада, ҳамчун туҳфа як-ду суруд хонад”.

Ин сароянда гуфтааст, бо далели он ки ҳофизи асосии ин тӯй набуд ва ройгон хизмат расонд, бо соҳиби маърака шартномаи хизматрасонӣ набаст. Ӯ таъкид кардааст, ки “ҳоло дар ягон ҷой кор накарда, ягон манбаи даромад надошта, дар таъминоташ панҷ фарзанди ноболиғ доштааст. Аз суд хоҳиш намуд, ки нисбат ба ӯ ҷазои сабук таъйин шавад. Гарчанде, ки ҳуқуқвайронкунанда Азизов О.Д. худашро дар содир намудани ҳуқуқвайронкунии маъмурӣ гунаҳгор ҳисоб накунад ҳам, гуноҳи ӯ бо далелҳои дар парванда мавҷудбуда, аз ҷумла санад, протоколи ҳуқуқвайронкунии маъмурӣ аз 19.08.2015 сол баёноти шоҳидон Шералӣ Исмоилов, Сайдобид Хоркашов, Муҳаммадӣ Саидов ва Бахтиёр Ҳакимов, ки дар баёноташон онҳо қайд кардаанд, ки дар тўйи мазкур сароянда Азизов Остонақул хизмат менамуд, тасдиқи худро меёбад”.

Остон аз хонаводаи хонандаҳои саршиноси Азизовҳо аст, ки замоне бо гуруҳи “Анис” овозадор буданд. “Нозанин”, “Дигар намеоям” ва “Лайлӣ ва Маҷнун” аз таронаҳои машҳури ӯянд.