11 мар 2016 10:47Тоҷикистон / Иҷтимоӣ / Рӯ ба рӯ / Видео / Тема дня

ВИДЕО: Нақли Ширин дар бораи садамаи маргбори 7 март

Ширин Қаюмова, яке аз се хонандаи мактаб, ки рӯзи душанбеи 7 март ҳангоми аз роҳ гузаштан зери чархи сабукрави “Опел” монданд, дар мавриди чӣ гуна рух додани ҳодиса нақл кард.

Ӯ, ки ҳоло дар беморхонаи Қарияи Болои шаҳри Душанбе бистарист, дар суҳбат ба “Озодагон” гуфт, он рӯз ҳамроҳ бо ду ҳамсинфаш – Сафинаву Карима мехост барои харидани яхмос ба он тарафи роҳ гузаранд: “Додарам ҳамроҳам буд, гуфт, ки ӯ ҳам бо мо меравад, аммо ман не гуфтам. Вақте ба назди роҳ расидем, як мошини майда ва як автобус буд, ман ба духтарон гуфтам, ки аввал онҳо гузаранд баъд меравем. Роҳ холӣ шуд ва вақте мехостем гузарем, мошин омад. Дигар чизе ба хотир надорам”.

Ба қавли Ширин, вақте ба ҳуш омад, баданаш пурхун буд ва Сафинаву Карима “дар замин хоб буданд”. Дубора дар дохили таксие ба ёд омадааст, ки ӯро ба беморхона расонд.

Дар бораи ин садама нахуст шоҳидон дар шабакаи иҷтимоӣ хабар доданд. Ба гуфтаи онҳо, як сабукрави “Опел” дар гузаргоҳи назди мактаби тоҷикию русии рақами 14, воқеъ дар канори роҳи мошингарди хиёбони Рӯдакӣ, се хонандаи мактабро пахш кард. Баъдан эълон шуд, ки ин хонандаҳо Ширин Қаюмова, Карима Қурбонова ва Сафина Наврӯзова буда, дар синфи панҷум таҳсил мекардаанд. Ба иттилои Вазорати умури дохилии Тоҷикистон, “Карима Қурбонова пас аз муддате дар беморхона ба ҳалокат расидааст”. Ба қавли наздикони Сафина, ӯ баъд аз як рӯзи садама дар беморхона ба худ омада, ҷарроҳӣ шудааст. Хосият Наврӯзова, модари Сафина дар суҳбат бо мо гуфт, аҳволи духтараш беҳтар шуда, бо ӯ суҳбат ҳам кардааст. Ҷароҳати Ширин нисбатан сабуктар гуфта мешавад.

Искандар Ҳабибов, мудири Шӯъбаи кӯдаконаи ҷарроҳии асаб дар суҳбат бо “Озодагон” гуфт, Ширин ва Сафинаро тақрибан соати 13-и рӯзи 7 март ба қабулгоҳ оварданд: “Ширин пас аз 10 дақиқа ба ҳуш омад. Дар натиҷаи садама сари ӯ осеб дида, ларзиши майнаи сарро низ муайян кардем. Ҳамчунин устохуни китфу пойи росташ лат хӯрдааст. Шояд пас аз 7-8 рӯз аз беморхона рухсат шавад”.

Вазорати умури дохилӣ рӯзи 9 март аз боздошти ронандае, ки бо мошини “Опел Вектра” хонандаҳои мактабро пахш кард, хабар дод. Ба иттилои манбаъ, ӯ сокини 25-солаи кӯчаи Неъмат Қарабоеви пойтахт буда, бо худ ҳуҷҷати ронандагӣ надоштааст. Манбаъ афзуд, дар пайи фоҷеа ронандаро шок фаро гирифт ва ӯ зимни бозпурсӣ изҳор дошт, ки аломати маҳдудкунандаи суръати ҳаракати роҳро надид ва дар хотираш нест, ки бо кадом суръат ҳаракат намудааст.

Дар ҳамин ҳол, зани амаки Ширин Қаюмова ба “Озодагон” гуфт, модари ин ронанда чанд бор ба дидорбинии хонандаҳо омадааст: “Модараш як зани калонсол ва боз бемор будааст. Гуфт, ки камбизоат мебошанд ва агар лозим бошад қарз карда, ба мо кумак мекунад. Аммо рад кардем”.

Мӯҳр

Хабарҳои монанд:

Mahina

Ачоиб барои мошин харида бе хуччат ба куча баромадан пул доранд, баде, ки касеро пахш карда куштанд ба фикрашон камбизоатиашон мерасад, шармандаги, бесаводи то ин дарача будааст. Вакте хунари мошинрони надори барои чи кучаи калон мебарои боз охиста наронда се кудакро мачрух карди, инсон магар хамин аст???? Ана натичаи харидани хуччатхои ронандаги, аз кучо ин одамон инсофро медонанад, ба онхо факат пул азиз аст, ана духтарак мурд, хаети чавонро дигар баргардонида наметавони, акнун аз камбагалии худат овоз бароварди, хайвон аз шумо барин одамон бааклтар аст.

Ҷавоб диҳед Иқтибос Шикоят

Эзоҳ илова кунед