12 апр 2016 16:16Тоҷикистон / Иҷтимоӣ

Мурофиаи ду тоҷикистонӣ барои қатли ронандаи таксӣ аз Узбакистон

Кумитаи тафтишотии вилояти Курск таҳқиқи парванда бо иттиҳоми куштор алайҳи ду шаҳрванди Тоҷикистон- Илҳомҷон Абдураззоқови 27- сола ва Фахриддин Кучкунови 25 – соларо ба анҷом расонда, барои баррасӣ ба суд равон кардаст.

Тибқи иттилоияи Кумитаи тафтишотӣ, ки имрӯз, 12 апрел нашр шуд, Илҳомҷон Абдураззақов бо як зани ҳамзисташ дар деҳаи Бибикови ноҳияи Советскии вилояти Курск зиндагӣ мекардааст ва мунтазам ба шаҳри Маскав барои мардикорӣ мерафтаст. Манбаъ мегӯяд, Абдураззоқов охири декабри соли 2014 хостааст барои таҷлили Соли Нав аз Маскав ба вилояти Курск баргардад ва писари амаки худ Фахриддин Кучкуновро низ ба меҳмонӣ даъват кардааст: “Бо ронандаи таксӣ, шаҳрванди 27 солаи Узбакистон созиш мекунанд, ки ба ивази 10 ҳазор рубли русӣ онҳоро ба Курск хоҳад бурд. Баъди расидан ба ноҳияи Советск мусофирон бо мақсади надодани роҳкиро ва соҳиб шудан ба мошини “Нексӣ”-и ронанда, нақшаи қатли ӯро мекашанд. Дар роҳ аз ронанда хоҳиш мекунанд, ки мошинро боздорад ва дукаса ӯро бо корд ба қатл мерасонанд. Ҷасадро дар канори роҳ партофта, бо мошини ғасбкардаашон ба назди ҳамзисти Абдураззоқов мераванд. Баъдан мошинро бо нархи 20 ҳазор рубл мефурӯшанд”.

Кумитаи тафтишотӣ мегӯяд, ҷасади ронандаи таксӣ танҳо моҳи апрели соли 2015 баъди об шудани барф аз ҷониби кормандони хадамоти сохтмон ва нигоҳдории роҳ дарёфт шудааст: “Кормандони пулис дар пайи амалиёт нафаре, ки автомашинаро харида буд, пайдо карда, бо ин восита моҳи майи соли 2015 фурӯшандаҳоро низ дастгир намудаанд”.

Мақомоти тафтишотӣ таъкид мекунанд, ки беш аз 16 намуди ташхисро гузаронда, далели кофӣ барои исботи гунаҳкории муттаҳамонро пайдо намудаанд.

Мӯҳр

Хабарҳои монанд: