Абдуллоҳ Рӯзиев, муҳоҷири 36-солаи тоҷик, ки баъди зуҳри 27-уми апрел дар Остона бо таҳдиди худкушӣ хостори мулоқот бо Назирмад Ализода, сафири Тоҷикистон дар Қазоқистон шуда буд, ба Ватан баргаштааст.
Тавре аз сафорати Тоҷикистон дар Қазоқистон ба “Озодагон” иттилоъ доданд, Рӯзиев мушкили молӣ дошт ва пеш аз зуҳри имрӯз, 28-уми апрел ба Душанбе фиристода шуд: “Аз Остона ба Алмато ва аз он ҷо ба Душанбе фиристода шуд. Ҳавопаймо аллакай дар Душанбе фуруд омад ва Рӯзиев дар Ватан қарор дорад. Худаш барои бозгашт ба Ватан эътирозе баён накард”.
Абдуллоҳ Рӯзиев, сокини 36-солаи вилояти Суғд 27 апрел болои пули «Аркар», дар рӯбарӯи бинои Суди олии Қазоқистон баромада, бо корд таҳдид кардааст, ки ба худ осеб мерасонад. Ӯ афзудааст, ки агар бо Назирмад Ализода, сафири Тоҷикистон дар Қазоқистон мулоқот накунад, аз болои пул худро поин мепартояд. Баъди он, ки Равшан Бобохонов, мушовири сафири Тоҷикистон дар Қазоқистон ба ҷои ҳодиса ҳозир шуд, Рӯзиев аз пул поин фаромада, дар як суҳбати кӯтоҳ иқдомашро чунин шарҳ дод: “Хостам, ҳаётамро наҷот диҳам. Бигзор бисёриҳо бинанд, ҳамаро кушта наметавонанд ку. Дигар шарҳе надорам”.
Вазорати умури хориҷии Тоҷикистон 27 апрел дар тасдиқи ин хабар ба “Озодагон” иттилоъ дода буд, ки Рӯзиев дар роҳи сафараш ба Маскав аз сарҳади Қазоқистон бо Русия бозпас гардонда шудааст. Манбаи “Озодагон” гуфт, “Рӯзиев аз Русия депорт шудааст, аммо боз талош кардааст, ки пиёда тариқи саҳро вориди Русия шавад, аммо марзбонон ӯро бозпас гардондаанд. Баъди чанд рӯзи саргардонӣ ӯ бо ин роҳ хостааст, бо сафири Тоҷикистон мулоқот кунад. Айни ҳол Рӯзиев дар сафорати Тоҷикистон дар Қазоқистон қарор дорад ва вазъаш хуб мебошад. Феълан масъулини сафорат ба ҳалли масъалаи бозгашти Рӯзиев ба Ватан машғуланд, зеро худи ӯ ҳатто роҳкиро надорад”.
Акси Рӯзиев дар роҳи бозгашт ба Ватан:
ВИДЕОҲОИ қазия:
Мӯҳр