11 май 2016 13:39Тоҷикистон / Иҷтимоӣ

Дархости ҷуброн барои марги тоҷикон дар теракти Домодедово (ВИДЕО)

Ҷабрдидаҳои теракт дар фурудгоҳи Домодедово, ки 37 кушта барҷой гузошт аз роҳбарияти ин фурудгоҳ миллиардҳо рубл ҷубронпулӣ талаб доранд.

Дар ин бора ба “Интерфакс” Игор Трунов, вакили дифои ҷабрдидаҳо ва яке аз ҳуқуқшиносони маъруфи Русия хабар додааст.

Ба гуфтаи Трунов ҳудуди 40 ҷабрдида аз роҳбарияти фурудгоҳ аз 50 то 700 миллион рубл талаб доранд: “Маблағи аз ҳама зиёдро Криволутская талаб дорад, ки дар пайи теракт ҷароҳати вазнин бардошта, ба табобату пайвандсозии гаронарзиш ниёз дорад. Маблағи аз ҳама кам 50 миллион рублро ташкил медиҳад. Тамоми даъвоҳо барои ҷубронпулӣ вобаста ба ҳаҷми зарари ҷабрдидаҳо пешниҳод шудаанд”.

Трунов таъкид кардааст, ки миёни даъвогарон барои ҷубронпулӣ дар баробари шаҳрвандони Русия инчунин шаҳрвандони Тоҷикистон, Узбакистон ва Сербия низ мебошанд. Ӯ афзудааст, теъдоди даъвогарон метавонад афзоиш ёбад, зеро муроҷиати ҷабрдидаҳо барои рӯёндани ҷубронпулӣ идома дорад.

Таркиш дар толори парвозҳои байналмилалӣ, ки моҳи январи соли 2011 ба вуқуъ пайваст, 37 кушта ва беш аз 170 маҷруҳ барҷой гузошт. Аз ҷумла дар пайи терракт ду шаҳрванди Тоҷикистон-Ҷабборов Собир Муҳаммадҷонович, соли таваллудаш 1963 ва Ҳақназаров Мурод Худойназарович, соли таваллудаш 1987 ба ҳалокат расида, 13 тоҷики дигар ҷароҳат бардоштанд.

Дар доираи таҳқиқи ин қазия Дмитрий Каменшик, соҳиби “Домодедово” барои хидматрасонии номутобиқ ба меъёрҳои амниятӣ ба ҳабси хонагӣ гирифта шуд. Алайҳи се роҳбари дигари фурудгоҳ низ барои таъмин накардани амният айб эълон шудааст. Аммо додситонии Русия иттиҳомот алайҳи масъулини фурудгоҳро беасос хонда, даъво дорад, ки миёни фаъолияти ин афрод ва марги одамон дар пайи таркиш, робитаи сабабу натиҷа вуҷуд надорад.

ВИДЕОИ теракт дар Домодедово: