Алишер ЗАРИФӢ
Азиз Гиёев, раиси ноҳияи Шуғнони вилояти мухтори куҳистони Бадахшон мегӯяд, қарор аст маросими ифтитоҳи ду бинои навсохт дар ноҳия бо ҳузури раисиҷумҳур сурат бипазирад.
Оқои Гиёев дар суҳбат ба “Озодагон” гуфт, бинои мактаби таҳсилоти миёнаи умумии №11-и ҷамоати деҳоти Кушк ва Раёсати кишоварзии ноҳия бахшида ба ҷашни Ваҳдати миллӣ ба истифода дода мешаванд. Бинои мактаб аз 88 синфхона иборат буда, барои 460 хонанда пешбинӣ шудааст. Раиси ноҳияи Шуғнон мегӯяд, мактаб бо 1,8 миллион доллари Бонки исломии рушд бунёд шудааст: “Мактаб аз 2 ошёна иборат аст. 130 нафар дар он кор карда истодаанд. 70 нафар кормандони ширкати “Муродалӣ”, ғолиби тендер ва кормандони боқимонда аз ҳисоби сокинони маҳаллӣ ҳастанд. Мактаб бо тамоми таҷҳизоти замонавӣ муҷаҳҳаз хоҳад шуд”.
Азиз Гиёев афзуд, корҳои сохтмонии Раёсати кишоварзӣ 90 дарсад анҷом ёфтааст. Ӯ гуфт, интизор меравад, дар ҷараёни боздиди Эмомалӣ Раҳмон Президент хишти нахустини сохтмони Қасри фарҳанги ноҳияро гузорад.
Масъулини ҳукумати Шуғнон мегӯянд, ба истифода додани мактаби №11 дастрасии бошандагони атрофи ноҳияро ба таҳсил осон мекунад. Қарор аст, минбаъд хонандаҳои деҳаҳҳои Кушк, Баргид, Бувед ва Возм барои таҳсил ба ин мактаб фаро гирифта шаванд. Ин дар ҳолест ки донишомӯзони бархе аз деҳаҳои дурдасти ноҳияи Шуғнон чандин километрро тай намуда, ба мактаб мераванд. Қурбоншоҳ Ниёзбеков, мудири мактаби миёнаи таҳсилоти умумии №48-и деҳаи Варшез ба “Озодагон” гуфт, баъзе хонандаҳо ҳудуди 6 километ роҳро тай намуда, барои дарсхонӣ меоянд: “Роҳ дур аст, лекин хонандаҳо сари вақт, саҳар соати 8 ба дарс ҳозир мешаванд”.
Дар баробари иншоотҳое, ки сохтмони он ба анҷом расидааст, дар ноҳияи Шуғнон сохтмони чандин бино, бо шумули Агентии шуғли аҳолӣ, бозори ноҳияи Шуғнон, меҳмонхона ва бинои таълимии литсеи касбӣ-техникӣ нотмам мондаанд. Масъулини ҳукумати ноҳия далели онро ба норасоии маблағу буҳрони молӣ рабт медиҳанд. Раиси ноҳияи Шуғнон мегӯяд, соҳибкороне, ки барои идомаи сохтмони иншоотҳои нотамом иқдом кардаанд, наметавонанд маблағи худро аз суръатҳисобашон дар намояндагии “Тоҷиксодиротбонк” дар маркази ноҳия бигиранд: “Филиали “Тоҷиксодиротбонк” калавида истодааст ва мо ҳам аз ин зарар мебинем. Зеро баъзе фирмаҳо, аз қабили фирмаи “Мустафо”, “Мадад”, ки дар ин бонк суратҳисоб доранд, наметавонанд маблағашонро бигиранд”.
Азиз Гиёев, раиси ноҳияи Шуғнон афзуд, барои ҳалли ин масъала унвонии Тоҷиддин Пирзода, раиси “Тоҷиксодиротбонк” мактуб фиристода, интизори посуханд.
Ноҳияи Шуғнон, ки 39,6 ҳазор аҳолӣ дошта, ба қавли масъулини ҳукумати ноҳия зиндагии бештари мардум аз ҳисоби муҳоҷирати меҳнатӣ, чорводорӣ ва қисман кишоварзию боғдорӣ пеш меравад. Ба омори расмӣ беш аз 7,5 ҳазор сокини ноҳия дар муҳоҷирати меҳнатӣ қарор дошта, ба иттилои оқои Гиёев солҳои охир ҳаҷми интиқоли маблағи онҳо коҳиш ёфтааст: “Маблағи муҳоҷирон барои оилаҳои сокинони ноҳия бисёр муҳим аст”.
11 май хатари кӯли сунъии Барсемро дар Шуғнон бартараф кардаанд. Ба қавли раиси ноҳия, ин кӯл дар пайи боришоти зиёд пайдо шуда буд ва дар сурати баркандан ба нерӯгоҳи “Помир энержӣ” хисорот ворид мекард. “Бар илова агар сел ояду тарма фарояд, то назди нергоҳ об пур шуда, мардуми Бадахшон бе барқ мемонад. Агар неругоҳ намебуд, барои мардум хатар надошт ва он ҷоро як макони тамошобобу истироҳатгоҳ мекардем”,-изҳор дошт Азиз Гиёев.