19 май 2016 15:59Тоҷикистон / Дасти хайр / Иҷтимоӣ / Рӯ ба рӯ / Муҳоҷир

Даъвати ҳомиёни ҳуқуқ барои ёрӣ ба тоҷики аз ғуломӣ раҳошуда

Ҳомиёни ҳуқуқи башари шаҳри Мурманск барои ба Тоҷикистон фиристодани Аҳмад Маҳмадов, як муҳоҷири тоҷик, ки ахиран аз ғуломӣ раҳо ёфт, кумак мехоҳанд.

Фарида Курдашова, раҳбари созмони “Мигрант” (муҳоҷир) 18 май дар суҳбат ба “Озодагон” гуфт, ба ниҳодҳои расмии Тоҷикистон ҳам муроҷиат кардаанд: “Ба Маҳмадназар Мирзода, консули фахрии Тоҷикистон дар шаҳри Санкт-Петербург муроҷиат кардем. Мукотибаҳо ҳам дорем бо он кас. Аммо ҳоло ягон посухи мушаххас нагирифтем”.

Раҳбари ин созмони марбут ба ироаи кумакҳои иҷтимоӣ ва мутобиқшавии шаҳрвандони хориҷи дуру наздик дар Мурманск мегӯяд, тайи ду моҳ мешавад, ба масъалаи кумак ба Аҳмад Маҳмадов машғул аст: “Ба ман нафарони зиёде занг зада, аҳволи Маҳмадовро мепурсанд, вале касе аз онҳо ба мо кумак намекунад. Диаспораҳои тоҷикон дар шаҳрҳои Санкт-Петербург ва Маскав ёрии худро расонданд, ки мо аз онҳо миннатдорем”.

Хонум Курдашова вазъи саломатии ин муҳоҷири тоҷикро бад арзёбӣ карда гуфт, баъди раҳоӣ аз ғуломӣ дар Мурманск 45 рӯз дар беморхона бистарӣ буд. Ӯро 14 май ҷавоб додаанд: “Сараш осеб дидааст. Ҳолаташ зуд зуд бад мешавад. Вақти дар ғуломӣ будан, ба бадани вай чӣ доруе гузарондаанд. Чанд маротиба аз ташхиси тиббӣ гузарондем, аммо чизе муайян нашуд”.

Ҳомиёни ҳуқуқи Мурманск мегӯяд, талоши онҳо барои ба Тоҷикистон фиристодани Маҳмадов то зимистон аст. Мушкил ин аст, ки ин муҳоҷири тоҷик бо худ ягон санад надорад: “Ман аз ҳамаи онҳое ки имкони ёрӣ доданро доранд, даъват мекунам барои ба ватан фиристодани ӯ кумак расонанд. Зимистони Мурманск хеле садр аст ва бо ин вазъе ки Маҳмадов дорад, товони бардошти онро надорад”.

Ҳомиёни ҳуқуқи башари шаҳри Мурманск қаблан хабар доданд, нафаре, ки муҳоҷири тоҷикро дар ғуломӣ нигоҳ доштааст, феълан дар ихтиёри мақомоти ҳифзи ҳуқуқ қарор дорад.

Мӯҳр

Хабарҳои монанд: