04 авг 2016 14:13Тоҷикистон / Сиёсат

Ализода: Алайҳи тоҷикони паноҳҷӯй дар Аврупо парвандае нест, маҳбуси сиёсӣ надорем

Зариф Ализода, ваколатдори оид ба ҳуқуқи инсони Тоҷикистон, мегӯяд, дар кишвар маҳбуси сиёсӣ нест ва алайҳи тоҷиконе низ, ки дар Аврупо паноҳандагӣ меҷӯянд дар Ватан парвандаю фишоре вуҷуд надорад.

Ализода имрӯз, 4 август дар посух ба суоли “Озодагон” гуфт, мафҳуми “маҳбусони сиёсӣ”, ки баъзан дар изҳоротҳои марбут ба Тоҷикистони созмонҳои байналмилалӣ истифода мешавад, бо қонунгузории Тоҷикистон мутобиқат надорад: “Зиндониҳои сиёсие, ки онҳо номбар мекунанд, аз нигоҳи қонунгузории ҷиноятии мо чунин чиз вуҷуд надорад. Инҳо ҷиноятҳои мушаххасанд, ки албатта ба сохтори давлатӣ, ба асосҳои сохтори конститутсионӣ ва ба дигар масъалаҳои давлатдорӣ сӯиқасд мекунанд. Ин ки мегӯянд, мисол, вай опозисион аст, ин на масъалаи ҳуқуқӣ, балки баҳои сиёсӣ аст”.

Ба гуфтаи Зариф Ализода “зиндонии сиёсӣ” истилоҳи ҳуқуқӣ ҳам нест: “Ин як истилоҳи сиёсӣ аст. Ҳаст ҷинояти мушаххас, кирдори мушаххас ва мақомотҳое, ки инро тафтиш мекунанд. Ман мефаҳмам, ки дар лексикони сиёсӣ аст, аммо дар қонунгузории мо чунин чиз нест”.

Ваколатдори ҳуқуқи инсон инчунин таъкид кард, алайҳи бисёри шаҳрвандони Тоҷикистоне, ки имрӯз дар кишварҳои Аврупо паноҳандагӣ гирифтаанд, дар Ватан парванда ва ё фишоре вуҷуд надорад: “Ба иттилои мо ҳудуди 500 шаҳрванди Тоҷикистон дар Лаҳистон паноҳандагӣ талаб кардаанд. Аксарияташон аз Русия, Украина ва дигар кишварҳо рафтаанд”.

Ализода таъкид намуд, ки онҳоро наметавон паноҳандаи сиёсӣ гуфт, ин афрод ба ҳамин роҳ хостаанд ба Аврупо раванд.

Ин дар ҳолест, ки ахиран идораи кор бо хориҷиёни Вазорати корҳои дохилаи Лаҳистон (Полша) иттилоъ дод, ки дар тӯли якуним соли охир ҳудуди 1200 шаҳрванди Тоҷикистон аз ин кишвар дархости паноҳандагӣ кардаанд ва аз ин теъдод танҳо ба як нафар расман мақоми паноҳанда дода шудааст.

Мӯҳр

Хабарҳои монанд: