06 авг 2016 10:23Тоҷикистон / Иқтисодӣ / Рӯ ба рӯ

Палатаи ҳисоб ошкор сохт, ки “мурдаҳо”-и куҷо нафақаи бештар гирифтаанд

Палатаи ҳисоби Тоҷикистон аз ошкор шудани ҳолатҳои пардохти нафақа баъди марги бознишастаҳо хабар медиҳад. Бино ба иттилои ин ниҳод, чунин ҳолатҳо зимни санҷишҳо дар Агентии суғуртаи иҷтимоӣ ва нафақаи ҳукуматҳои маҳаллӣ бар асоси як ҷаласаи васеи Шӯрои амният ошкор гардидааст.

Манбаъ меафзояд, дар бештари ҳолат масъулини Агентии суғуртаи иҷтимоӣ ва нафақа ва Раёсату шӯъбаҳои он дар шаҳру навоҳӣ аз ҳисоби ёрдампулиҳо барои гӯру чӯби нафақагирони фавтида, бозпас нагардондани маблағи чунин афрод, дар суратҳисоби нафақагирони фавтида нигоҳ доштани маблағ, пардохти нафақа баъди марг, аз меъёрҳои муқаррашуда ва барзиёд пардохт намудани нафақа хисороти ҳангуфте ба буҷа расонидаанд.

Палатаи ҳисоб мегӯяд, давоми шаш моҳи соли равон дар ноҳияи Бохтари вилояти Хатлон дар маҷмӯъ 374 ҳазор сомонӣ ба номи нафақагирони фавтида сабт шудааст: “Аз ҷумла ба нафақагирони фавтида, ки беасос ҳамчун оилаҳои камбизоат эътироф гардидаанд, ҷуброн намудани истифодаи қувваи барқро ба 689 нафар дар ҳаҷми 69,0 ҳазор сомонӣ, пардохти беасоси кӯмакпулӣ барои дафни 309 нафар 247,2 ҳазор сомонӣ, пардохти нафақапулӣ баъд аз вафоти 68 нафақагир 26,7 ҳазор сомонӣ ва дар суратҳисоби 96 нафар нафақагири фавтида нигоҳ доштани маблағи 31,1 ҳазор сомонӣ ошкор гардид”.

Ба иттилои манбаъ, дар шаҳри Ҳисор бошад, Бахши ҳифзи иҷтимоии аҳолӣ дар 8 ҷамоати деҳот беасос 81 оиларо ҳамчун камбизоат пазируфта, ба онҳо кӯмаки унвонии иҷтимоӣ дар ҳаҷми 22,6 ҳазор сомонӣ ва кӯмакпулӣ барои дафн 64,8 ҳазор сомонӣ пардохт кардааст. Ҳамчунин ин ниҳод ошкор кардааст, ки ҳолатҳои ғайриқонунии таъин ва пардохти нафақа дар шаҳри Турсунзода дар 6 ҳолат ба маблағи 14,4 ҳазор сомонӣ, шаҳри Ваҳдат дар 8 ҳолат ба маблағи 3,9 ҳазор сомонӣ, ноҳияи Вахш дар 12 ҳолат ба маблағи 6,7 ҳазор сомонӣ ва ноҳияи Исмоили Сомонии шаҳри Душанбе дар 32 ҳолат ба маблағи 25,8 ҳазор сомонӣ, инчунин дар суратҳисоби нафақагирони фавтидаи шаҳри Турсунзода беасос нигоҳ доштани маблағи 234,4 ҳазор сомонӣ, шаҳри Ваҳдат 44,4 ҳазор сомонӣ, ноҳияи Вахш 22,3 ҳазор сомонӣ ва ноҳияи Исмоили Сомонии шаҳри Душанбе ба маблағи 14,5 ҳазор сомонӣ будааст.

Палатаи ҳисоб мегӯяд, аз ҳисоби риоя нагардидани тартиби муқарраршуда ва ҳамоҳангсозии корҳо байни Раёсати Агентии суғуртаи иҷтимоӣ ва нафақа ва “Амонатбонк” дар 92 ҳолат ба аъзои оилаҳои нафақагири фавтида нафақа 25,9 ҳазор сомонӣ пардохт гардида, дар суратҳисоби 85 нафақагири фавтида 23,7 ҳазор сомонӣ нигоҳ дошта шудааст.

Ин ниҳод дар Раёсати Агентии суғуртаи иҷтимоӣ ва нафақаи Истаравшани вилояти Суғд зарари молиявиро ба маблағи 51,6 ҳазор сомонӣ муайян намудааст ки асосан аз ҳисоби нисбати меъёрҳои муқарраршуда барзиёд таъин ва пардохт кардани нафақапулӣ, саривақт ба буҷетҳои дахлдор бозпас нагардонидани маблағи нафақагирони фавтида ва бақияи кӯмакҳои унвонии иҷтимоӣ мебошад.

Мӯҳр

Хабарҳои монанд: