28 сен 2016 13:47Тоҷикистон / Сиёсат

Илҳом Алиев: Таҷрибаи сулҳи тоҷикон ҳанӯз барои кишварҳои ноором пешниҳод мешавад

Шукурҷон Зуҳуров, раиси Маҷлиси намояндагони Тоҷикистон дар шаҳри Боку бо Илҳом Алиев, раисиҷумҳури Озарбойҷон дидору мулоқот кардааст.

Муҳаммадато Султонов, сухангӯи палатаи поёнии парлумони Тоҷикистон аз шаҳри Боку ба “Озодагон” гуфт, ин дидор имрӯз, 28 сентябр сурат пазируфт ва ҷонибҳо бештар масоили ҳамкориҳои ду кишварро баррасӣ намуданд. Ба иттилои манбаъ, Зуҳуров гуфтааст, масоили густариши равобити фарҳангии миллатҳои мо ба ҳамкориҳои байнипарлумонии ду кишвар марбут аст, зеро алоқаҳои адабӣ ва эҷодии халқҳои мо решаҳои амиқи таърихӣ доранд. “Мо саҳми арзандаи миллати озарбойҷонро дар рушди фарҳанги тоҷикӣ ба хотир дорем. Инҳо муҳаррири аввалин рӯзномаи тоҷикӣ Мирзо Ҷалол, тарҷумони маъруф Раҳим Ҳошим, муаллифи муҷассамаҳои Айнӣ ва Рӯдакӣ, ки дар пойтахти Тоҷикистон қомат афрохтаанд, Фуад Абдураҳмонов мебошанд”,-таъкид намудааст раиси Маҷлиси намояндагон.

Ҷаноби Султонов афзуд, Шукурҷон Зуҳуров дар идома дастовардҳои Озарбойҷонро дар мубориза бо бекорӣ, дар бахши ба даст овардани даромад аз коркард ва истеҳсоли нефт барои кишварҳое ки чунин мушкиолотро доранд, намунаи ибрат донистааст.

Сухангӯи палатаи поёнии парлумони Тоҷикистон мегӯяд, Илҳом Алиев, раисиҷумҳури Озарбойҷон дар навбати худ изщор дошт, ки “корҳои созандагиву бунёдкории бемислу монанди Президенти Ҷумҳурии Тоҷикистон Эмомалӣ Раҳмон ва ба як кишвари дар ҳоли рушд қарор додани Тоҷикистон дар ҷомеаи ҷаҳонӣ сари забонҳост. Таҷрибаи сулҳи тоҷикон бо гузашти чандин сол ҳанӯз ҳам барои кишварҳои ноором пешниҳод карда мешавад”.

Алиев гуфтааст, доштани таърих, тамаддун, дину мазҳаб ва фарҳанги муштарак ба мо имкон фароҳам меорад, ки робитаҳои худро дар ҳамаи соҳаҳо, аз ҷумла, сиёсӣ, иқтисодӣ, тиҷоратӣ, кишоварзӣ, илму маориф, фарҳанг, варзиш, туризм ва ғайра тақвият бахшем.

“Дар ҷараёни мулоқот, ҳамчунин дигар масъалаҳои минтақавию байналмилалӣ, аз ҷумла мубориза бо зуҳуроти номатлуби ҷомеа мисли терроризм, экстремизм ва дигар масъалаҳо баҳсу баррасӣ шуданд”,-таъкид намуд Муҳаммадато Султонов.

Мӯҳр

Хабарҳои монанд: