Поёни маъмурияти дипломатии Абдулғафури Орзу дар Тоҷикистон (ВИДЕО)
Маъмурияти дипломатии сафири Афғонистон дар Тоҷикистон ба поён расидааст.
Дар пайи ин, Сироҷиддин Аслов, вазири умури хориҷии Тоҷикистон бо Абдулғафур Орзу мулоқот намудааст. Дафтари матбуоти ВКХ мегӯяд, ин мулоқот 2 ноябр сурат пазируфта, ҷонибҳо аз густариши бемайлони муносибатҳои дуҷониба ва бисёрҷонибаи Тоҷикистону Афғонистон изҳори қаноатмандӣ карда, атрофи самтҳои дурнамодори ҳамкориҳои мутақобилан судманди ду кишвар дар арсаҳои иқтисодӣ, тиҷоратӣ, энергетикӣ, нақлиётӣ ва фарҳангию башарӣ табодули назар анҷом доданд: “Бар зарурати тавсеаи ҳамкориҳои наздисарҳадӣ ва муборизаи муштарак алайҳи терроризми байналмилалӣ, экстремизм ва дигар чолишҳои амнияти ду кишвар ва минтақа таъкид гардид. Вазири корҳои хориҷии Тоҷикистон ба Сафири Афғонистон барои саҳми назаррас дар таҳкиму густариши робитаҳои дӯстона ва ҳамкориҳои созандаи Тоҷикистону Афғонистон изҳори сипос кард ва барои фаъолияти минбаъдаи ӯ дар ҷодаи дипломатия муваффақиятҳо орзӯ намуд”.
Орзу аз тобистони соли 2010 ба ин сӯ курсии сафири кишвараш дар Душанберо дар ихтиёр дошт. Декабри соли 2014 дар як суҳбати ихтисосӣ ба "Озодагон гуфта буд, дар Тоҷикистон ҳеч эҳсоси бегонагӣ намекунад: "Аз табиати зебои Тоҷикистон, аз мардуми ҳамзабони Тоҷикистон, ки ҳамзабонӣ хешиву пайвандӣ аст, аз амнияте, ки дар инҷо устувор аст, табиист ки отифаи инсониро бармеангезад. Вақте ки отифаи инсонии маро бармеангезад, табиист бисёр бароҳатӣ фарёд мезанам:
Тоҷикистон, Тоҷикистон,
Эй куҳанманзумаи сабзи Хуросон.
"Бӯи ҷӯи мӯлиён"-ат ҷовидон бодо,
"Ёди ёри меҳрубон"-ат ҷовидон бодо.
Ҷовидон бодо сурудат,
Нағмаҳои чангу удат,
Чашмасоронат хурушон бод
Кӯҳсоронат зарафшон бод,
Тоҷикистон, Тоҷикистон
Эй куҳанманзумаи сабзи Хуросон".
СУҲБАТИ ВИДЕОИРО БО АБДУЛҒАФУРИ ОРЗУ ИНҶО БУБИНЕД
ЗИНДАГИНОМА
Доктор Абдулғафури Орзу сафири кабири Ҷумҳурии Исломии Афғонистон дар Ҷумҳурии Тоҷикистон 53 сол муқаддам дар шаҳри бостонии Ҳирот дар хонадони фарҳангӣ таваллуд шудааст. Унвони докториро дар риштаи адабиёти дарӣ аз Донишгоҳи тарбияти мударриси Теҳрон гирифтааст.
Дар мақомҳои гуногуни давлатӣ, аз ҷумла, раиси идории вилояти Ҳирот, иҷрокунандаи вазифаи сафир дар сафорати куброи Ҷумҳурии Исломии Афғонистон дар Теҳрон ва мушовири вазири хориҷаи Афғонистон ифои вазифа намудааст.
Дар баробари корҳои давлатӣ муаллифи беш аз чиҳил асари илмӣ, сиёсӣ ва бадеӣ мебошад. Ҷаноби Абдулғафури Орзу шеърҳои зиёде низ гуфтааст, ки дар маҷмӯъаҳое “Ҷоритар аз ҳамеша”, “Чашм дар чашми ойина”, “Суруди мусалсал” , “Чаҳор шоир чаҳор бародар”, “Ҳамосаи Соти Барзан” ва “Лабханди Худо” ба нашр расидаанд.
Оқои Орзу инчунин чандин рисолаи илмию пажӯҳишӣ ва кутубе, монанди “Сиёсати хориҷии Афғонистон дар қарни 21”, “Афғонистон ва ҷомеаи ҷаҳонӣ”, “Чигунагии ҳуввияти миллии Афғонистон”, “Рӯшанфикр кист?” , “Хӯшаҳое аз ҷаҳонбинии Бедил", "Диранге дар адабиёти Фаранг (барои донишҷӯён)", "Шод зӣ...(дар қаламрави Рӯдакӣ)", "Агар Фарҳод шуд, Ширин бимонод" дар бораи достони "Хусраву Ширин"-и Низомӣ, "Нақди Халилӣ", "Шеъру шуҳуди орифона", "Муқоисаи инсони комил аз дидгоҳи Бедил ва Ҳофиз", "Дар хонаи офтоб" (дар бораи Бедил) ва ғайраро мунташир кардааст.
Китоби “Шод зӣ...”(дар қаламрави Рудакӣ) ва маҷмӯаи шеърии вай – “Лабханди Худо” ба хатти сирилик низ ба нашр расидаанд. Аз соли 2010 сафири Ҷумҳурии Исломии Афғонистон дар Тоҷикистон мебошад.
Оиладор, соҳиби се фарзанд; ду писар ва як духтар мебошад.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |