Зуҳуров ба сафири афғон: Интиқоли бор набояд сиёсӣ шавад
Шукурҷон Зуҳуров, раиси Маҷлиси намояндагони Тоҷикистон аз сиёсӣ шудани масъалаи транзит ва ҳамлу нақли бор тариқи Афғонистон изҳори нигаронӣ кардааст.
Зуҳуров 11-уми ноябр дар мулоқот бо Абдулғаффори Орзу, сафири Афғонистон, ки ваколати дипломатиаш дар Тоҷикистон анҷом ёфт, изҳор дошт, ки долонҳои нақлиётӣ набояд барои пиёдасозии ҳадафҳои кӯтоҳмуддати сиёсӣ истифода шаванд: “Тиҷорат ва транзит дар замони муосир яке аз муҳаррикони муассири иқтисоди ҷаҳонӣ ва омили тақвияти тамосҳои байниинсонию байнифарҳангӣ маҳсуб мешаванд. Аз ин лиҳоз, мо бар ин назар ҳастем, ки долонҳои нақлиётӣ ва масъалаи ҳамлу нақли транзитӣ, бахусус тавассути Афғонистон, набояд ба абзори сиёсӣ табдил ёбанд ва ин мавзӯъҳои ҳассос набояд барои пиёдасозии манфиатҳои кутоҳмуддати сиёсӣ истифода шаванд. Имкониятҳои транзитии Афғонистон бояд барои рушди тиҷорати байниминтақавӣ хидмат кунанд ва ин кишвари дӯст аз тиҷорату транзит ҳамчун абзори муассири инкишофи иқтисодии кишвар ва ҳамкориҳои судманди минтақавӣ истифода кунад. Зеро тақвияти робитаҳои тиҷоратӣ ҳам ба нафъи мардуми Афғонистон ва ҳам ба нафъи рушди босуботи минтақа аст”.
Ин таъкиди Зуҳуров дар ҳолест, ки Муҳаммад Ашраф Ғанӣ, раисиҷумҳури Афғонистон моҳи сентябри соли равон эълом кард, ки иҷозаи убури колои Покистонро аз хоки худаш ба Тоҷикистон ва кишварҳои дигари Осиёи Марказӣ нахоҳад дод.
Ин иқдоми ҳукумати Афғонистон посух ба Покистон арзёбӣ шудааст, ки барои ҳамлу нақли колоҳои бозоргонони афғон аз бандари “Вога”-и ин кишвар иҷоза надодааст. Ашраф Ғанӣ таъкид карда буд, ки “Покистон ҳамеша дар фасли мева роҳҳои тронзитии худро ба рӯи колоҳо ва маҳсулоти бозоргонҳои Афғонистон мебандад ва ин боис мешавад то бозоргонони афғон солона миллионҳо доллар зарар кунанд”.
Қаблан Кобул барои роҳ додани тоҷирони Покистон ба Тоҷикистон, шарт гузошта буд, ки Исломобод тоҷирони Афғонистонро ба Ҳиндустон роҳ диҳад. Шарти Афғонистон, ки аз Покистон хостааст, монеи тиҷорат бо Ҳиндустон нашавад, соли гузашта боиси ба таъхир гузоштани имзои созишномаи транзитии Тоҷикистон, Афғонистон, Покистон шуда буд: “Баъди чанд соли гуфтушунид, аввали соли гузашта, зимни имзои созишномаи транзитии сеҷонибаи Тоҷикистон-Афғонистон-Покистон, Кобул шарти нав дар мавриди Ҳиндустонро пешниҳод кард, ки норозигии Исломободро ба вуҷуд овард. Ин нофаҳмӣ боиси боз ба таъхир гузоштани имзои созишнома гардид”.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |