28 авг 2017 08:48Оcиёи Марказӣ / Тоҷикистон

Э.Раҳмон ба ҷамъоварии картошка рафт (АКС)

Эмомалӣ Раҳмон, раисиҷумҳури Тоҷикистон охири ҳафтаи гузашта бо мақсади шиносоӣ бо вазъи соҳаи картошкапарварӣ ва парвариши занбӯри асал аз мавзеи Канаски ҷамоати деҳоти Ромити шаҳри Ваҳдат боздид кард.

Тибқи иттилои дафтари матбуоти раисиҷумҳур майдони умумии мавзеъи Канаск 40 ҳазор гектарро ташкил медиҳад ва иқлими он басо салқин ва табиаташ зебову назаррабо аст: “Мавзеи Канаск дар қисми шимолу шарқии шаҳри Ваҳдат дар баландии 2300-2500 метр аз сатҳи баҳр, дар масофаи 100 километр дурӣ аз маркази шаҳр ҷойгир мебошад”.

Манбаъ афзуд, бо Қарори Ҳукумати Ҷумҳурии Тоҷикистон аз 12 ноябри соли 2016 Корхонаи воҳиди давлатии “Хоҷагии ёрирасони Канаск” таъсис дода шуда, аз моҳи апрели соли 2017 майдони умумии 40 ҳазор гектар заминҳои мавзеи Канаски деҳоти Ромити шаҳри Ваҳдат ба тавозуни корхона гузаронида шуд: “Дар Корхонаи воҳиди давлатии “Хоҷагии ёрирасони Канаск” 45 нафар коргари доимӣ ва 35 нафар ба таври мавсимӣ ба кор ҷалб карда шудаанд. Корхонаи воҳиди давлатии “Хоҷагии ёрирасони Канаск” бо 37 хоҷагии чорвопарвар шартномаи ҳамкорӣ бастааст”.

Дафтари матбуоти раисиҷумҳур афзуд, Эмомалӣ Раҳмон барои фаъолияти корхона ва пешбурди корҳои хоҷагидорӣ беш аз 800 ҳазор сомонӣ ҷудо намуданд: “Баҳри мусоидат ба рушди соҳаи картошкапарварию занбуриасалпарварӣ Вазорати кишоварзии Ҷумҳурии Тоҷикистон 340 тонна тухмии 10 навъи картошкаи тезпазак ва 600 оилаи занбуриасал ба мавзеи Канаск дастрас кард”.

Эмомалӣ Раҳмон ба Вазорати кишоварзии ҷумҳурӣ дастур додааст, ки масоҳати кишти картошкаи тухмиро дар соли 2018 ба 400 гектар васеъ намуда, ҳосили онро ба 16 ҳазор тонна расонад: “Тухмии истеҳсолгардидаи картошкаи барвақтии мавзеъи Канаск асосан барои ба роҳ мондани кишти барвақтии картошка дар ноҳияҳои водии вилояти Хатлон ва минтақаи Ҳисор истифода мегардад”.

Инчунин раисиҷумҳури Тоҷикистон масъулини соҳаи кишоварзии кишварро барои истифодаи самараноки замин, истеҳсоли тухмиҳои аълосифат, таъмини фаровонии бозори истеъмолӣ, ба роҳ мондани содироти маҳсулоти кишоварзӣ, ҷамъоварӣ ва бастабандии гиёҳҳои шифобахши мавзеи Канаск, баҳри таъмини амнияти озуқаворӣ ва рушди бахши тухмипарварӣ муваззаф кардааст.