Ҳаҷми истеҳсоли корхонаи ТАЛКО беш аз 27 миллион сомонӣ кам шуд

Ҳаҷми истеҳсоли маҳсулоти саноатӣ дар Тоҷикистон тайи 3 моҳи ахир 1 миллиарду 956,7 миллион сомониро ташкил дод, ки ин нишондод нисбат ба ҳамин давраи соли гузашта 249,5 ва ё 114,6% зиёд шудааст.

Тавре аз Вазорати энергетика ва саноати кишвар ба хабаргузории Озодагон иттилоъ доданд, афзоиш аз ҳисоби корхонаҳои системаи вазорати мазкур 91,1 миллион сомониро ташкил намудааст: «Аз ҳисоби корхонаҳои пахтатозакунӣ 173,3 ва бахши хусусӣ  31,8 миллион сомонӣ таъмин гардидааст»,-афзуд манбаъ. Аммо дар  ҳамин давра корхонаҳое, ки тобеияти идоравӣ надоранд, ба маблағи 63, 3 миллион сомонӣ ва КВД «Ширкати Алюминии Тоҷик» ба маблағи 27,5 миллион сомонӣ ҳаҷми маҳсулоти саноатиро кам кардаанд. Сарчашмаи хабар мегӯяд, дар маҷмӯъ, корхонаҳои системаи Вазорати энергетика ва саноат давоми моҳҳои январ, феврал ва март дар ҳаҷми беш аз 700 миллион сомонӣ маҳсулот истеҳсол намудааст, ки дар муқоиса ба ҳамин давраи соли 2011-ум 115% афзоиш ёфтааст. Афзоиши истеҳсоли маҳсулоти саноатӣ ва дигар навъи маҳсулот дар ҳолест, ки имрӯзҳо дар бархе бозору фурӯшгоҳҳои кишвар нархи молҳои саноатӣ ва дигар намуди озуқаворӣ боло рафтааст. Ин омилро гурӯҳе аз коршиносон дар монополияи бозор аз ҷониби як шахс ё як гурӯҳ арзёбӣ мекунанд. Бархе аз соҳибназарони дигар мегӯянд, феълан афзоиши молҳои ниёзи аввал то ҷое нарасидааст, ки талаботи бозорро қонеъ гардонида тавонад.

 

Мӯҳр