Корфармоҳои тоҷик 23 миллиони коргаронашонро надодаанд

Тибқи иттилои Агентии омори назди президенти Тоҷикистон танҳо дар моҳи феврали соли ҷорӣ корфармоҳо дар кишвар маоши кормандонро дар ҳаҷми 6 миллиону 500 ҳазор сомонӣ пардохт накардаанд.

Ин нишондод 38,9 фоизи маоши пардохтнашударо дар кишвар ташкил медиҳад. Дар маҷмӯъ корфармоҳо ба ҳолати аввали моҳи марти соли ҷорӣ аз коргарон 23 миллиону 300 ҳазор сомонӣ қарздоранд.

Қарздории маош дар бахши воқеии иқтисод ба ҳолати моҳи марти имсол 20,6 миллион сомониро ташкил дода, дар моҳи феврал 27,7 фоиз ё 4 миллиону 400 ҳазор сомонӣ зиёд шудаст. Маоши кормандони бахши хоҷагии қишлоқу ҷангалпарварӣ дар моҳи феврали соли ҷорӣ ҳамагӣ 144 сомониро ташкил додаст, ки пасттарин нишондод дар ҷумҳурӣ мебошад.

Дар бахши моҳидорӣ маош дар феврал ба 266 сомонӣ баробар шудаст. Дар бахши воқеии иқтисод Агентии омори Тоҷикистон маоши баландтаринро дар соҳаи кӯҳкорию саноат ба қайд гирифтаст, ки бештар аз 1 ҳазор сомонӣ аст.

 

Мӯҳр